O le afioga Lautafi Fio Selafi Purcell o le Minisita ua nafa nei ma le vaaia o faalapotopotoga tumaoti a le Malo faapea le faalapotopotoga o eleele a le Malo sa ia tatala le mafutaga poo se fono tau i fefaataua iga ma le atinae o le tamaoaiga a faigamalo a Samoa Tutoatasi ma Samoa i Sasae ile faigamalo faateritori a Tutuila ma Manu‘a o loo i lalo o le vaaiga a le Malo o Amerika.
O mafutaga nei e faasoa ai auala ma saili ai ni faiga e faaleleia ai fefaataua‘iga ma le` atinae o le tamaoaiga o Samoa e lua. Pe afai e manatua e le aufaitau, o fonotaga nei e maua ai le sologa lelei o le faagaioia o le fela‘ua‘iga o oloa ile va o Apia ma Pago Pago a le au faipisinisi.
E iai vaega e faafaigata ai Amerika Samoa i nisi taimi e pei o le totogi o lafoga i luga o oloa e faatau atu i ai aemaise foi o le itu i pemita e femalagaa‘i ai le aufaipisinisi.
O le autu lea o le saunoaga a le minisita na tatala ai le mafutaga, ia faafaigofie mea faigata ina ia televave ma lelei le atinae o faigamalo e lua a Samoa.
Na faaalia e le taitai o le aumalaga mai Amerika Samoa, ua iai se isi auala faigofie mo le aufaipisinisi mai Samoa e fia malaga atu, o le talosaga lea o le pemita e tuusaunoa mo le ono masina poo le multipurpose visa.
O se faiga na ia faaalia o le a lē tau faia ai le tulaga sa iai muamua o le malaga lava ma le talosaga i se pemita, e tusa lava pe o se malaga e na o le lua aso pe tolu foi, ia pe na o se vaiaso.
O le lafoga o le tariffs lea e faaopoopo i luga o le tau o le totogi e faaulufale ai ni oloa mo fefaatauaiga, o se isi lea vaega o loo manaomia le faataugofie ina ia vave ona aveese oloa ma le uafu poo le malaevaalele ae faatau loa i pisinisi latou te toe faatauina atu i le lautele o tagata. O se tasi o vaega tāua ua molimauina talu ona faia le fesootaiga lenei, ua faatau i Samoa Tutoatasi apai‘a o le Wahoo, sa na o faaoso e aumai Amerika Samoa e faatoa maua ai. Peitai o lea ua faatau nei ia ituaiga o apai‘a poo apatuna o loo gaosi e fale tuuapai‘a i Tutuila i totonu o Samoa.
Faaalia e le tamaitai pule sili o le Matagaluega o Fefaataua‘iga ma Leipa faapea pisinisi ma ala manuia le afioga Galumalemana Peseta Margret Malua, o le sini lava o loo tulituliloa ia faafaigofie auala o fefaataua‘iga i le va o Samoa e lua.
A lelei le tulaga lea o le a vave ma sologa lelei fefaataua‘iga, ma o le manuia foi lea o taumafaiga a le aufaipisinisi.
O se isi itu na ia faaalia o avanoa faigaluega e maua e tagata i Samoa i totonu o Amerika Samoa aemaise i kamupani tuuapai‘a.
O loo fulisia tagata faigaluega o ia kamupani i tagata mai Samoa Tutoatasi ma o loo naunau pea e faateleina ia avanoa auā o seleni latou te maua, e lafo mai i aiga ma atili tupu ai le tamaoaiga o le atunuu.
E pei ona silafia o se tasi lea o tulaga lelei i avanoa faigaluega faavaitaimi o loo faafaigaluega ai tagata mai Samoa ma isi atunuu o le Pasefika i faatoaga i Niu Sila ma Ausetalia.
