Fausia i Satitoa se maota na faatupe e alo o Samoa i Townsville Ausetalia

O le faaiuga o le vaiaso (Aso Toonai) na faamaea ma faapaia ai lava le maota lenei o se tasi o aiga i Satitoa ua faamanuiaina i se fesoasoani mai nisi o alo o Samoa ua manatu e tuufaatasi a latou sailiga seleni i Townsville i Ausetalia ae lafo mai i Samoa aua le fausia o ni fale mo e na puapuagatia ona o le mafuie ma le sunami o le aso 29 o Setema, 2009.
O lenei fesoasoani mai le faalapotopotoga lenei ua faaigoaina o le Samoa Laalaa ua fesootai mai i le Faalapotopotoga o le Apitaga mo Tagata Samoa i Apia ina ia faatinoina lo latou manaoga.
“Na lafo mai le $20,000 tala Samoa ma faapea mai e saili se aiga ua matua moomia lava se fesoasoani ae e matua faigata lava ona gaioi mo se fale e faamautu ai talu mai le sunami, ma o le aiga o … ma … i Satitoa lea na malilie le Apitaga mo Tagata Samoa e fausia lo latou fale,” o se faaaliga lea a le Afioga Tuifaasisina Mata Schuster, le Peresitene o le faalapotopotoga lenei o le Apitaga mo Tagata Samoa.
O tau o fale e masani ona fausia e lenei faalapotopotoga e tai $15,000 tala ma o le fale lenei na taua e Tuifaasisina na totoe le tupe ma ua amata ai nei se isi foi seleni o le a faaatoa mai foi e le Samoa Laalaa mo se isi maota i totonu o se tasi o afioaga na aafia i le sunami.
O le faafetai lava na faaalia e si aiga lenei ina ua filifilia i latou e amata ai ona fausia maota o aiga i Satitoa ia na aafia uma ona o le faalavelave faalenatura na fano ai le toatele o tagata o Samoa aemaise o le faaleaga ai o le tele meatotino aemaise o maota o aiga.
Ua tele foi ina see uma i le pitonuu a uta le afioaga o Satitoa ma o se tasi lenei o nofoaga ua matua suia ona foliga vaaia ona o le galu na ta ma faaleaga uma ai lea itu o le Atu Aleipata. Ua tele tausaga talu ona faavae mai le faalapotopotoga lenei i Samoa ua faaigoaina nei o le Apitaga mo Tagata Samoa.
O le tausaga e 2000 na uluai faalauiloa ai lona faavae mai o se lala o le Faalapotopotoga faavaomalo Kerisiano lea ua taua o le Habitat for Humanity lea foi e galulue i le taimi nei ona sui i le fausia o fale i lalo o le Polokalame a le Malo o Samoa lea ua faatutu ai fale fou o aiga ia na aafia uma maota i le sunami.
O le tausaga e 2007 na see ese ai lava le lala lenei o lea faalapotopotoga ma avea ai ma faalapotopotoga tutoatasi. E saili atu lava la i Samoa nei faalapotopotoga poo tagata foi e iai le manaoga e ofo mai le tau o fale nei ua fausia mo aiga ua le tagolima ma ua tele fale ua mafai ona fausia ai i lalo o le fesoasoani lenei.
O le fesootaiga la lenei ma le Samoa Laalaa ua faaopoopo ai lenei fesoasoani mo aiga nei na aafia i le tausaga na tea nei. O loo saili nei la i le taimi nei se isi aiga ma se isi nuu e faatautaia ai lenei galuega alofa.
Ua ese mai le fesoasoani lenei a le Samoa Laalaa ma le Apitaga mo tagata Samoa ma le polokalame e pei ona muai faalauiloa atu a le Malo lea ua faapea e 500 maota ua amata fausia ai lea e alu ai le 9 miliona tala Samoa.
Ua le gata i lea ae ua fausia foi nisi maota e le Ekalesia a Iesu Keriso o le Au Paia o Aso e Gata Ai.
E le gata i lea o le fesoasoani a le Ekalesia Katoliko e ala i lana faalapotopotoga fesoasoani o le Caritas. O loo iai foi isi maota ua fau i lalo o sailigatupe a le kamupani telefoni feaveai o le Digicel ma isi lava fesoasoani mai fanau a Samoa i atunuu mamao.
O loo faagasolo lava uma nei galuega i le taimi nei i nofoaga fou ia ua maea ona see i ai le tele o aiga ua aafia i itu eseese o Upolu ma Savaii.