Ua filifilia nei e le Komesina o le matagaluega o leoleo ma falepuipui le afioga ia Lilomaiava Fou Taiolao se tasi o ana Komesina lagolago fou le susuga Fauono Tala Tapu, e avea ma sooupu mo le matagaluega i le va feagai ai ma le autusitala. O le faalauiloaina o le sainigalima le Memorandum of Understanding poo le MOU a le pulega o numera faamaumauina ma le matagaluega o leoleo, na faailoa ai e le Komesina lea filifiliga.
O Fauono o se tasi o leoleo sinia ua silia i le tolu sefulu tausaga o galue i le matagaluega ma o loo ia umia le tulaga poo le rank o le superenetene. O le tausaga nei na pale atu ai i se tasi o tofiga komesina lagolago. O lona avea ai ma sooupu ua sui tulaga ai i le afioga Leaupepe Fatu Pula o se tasi o komesina lagolago ua lē toe filifilia, ina ua mae‘a lana konekarate tolu tausaga lea ua malolo nei mai ona tofiga faaleoleo.
O le Aso Lua o le vaiaso nei o le uluai feiloaiga lea a Fauono ma tusitala mo le faalauiloaina o mataupu a le matagaluega aemaise o solitulafono o loo lipotia atu i le matagaluega ma faia i ai suesuega. O le molimau a le afioga Leaupepe sa avea ma sooupu, e lē o se galuega faigofie sa feagai ma ia, ona o le tele o taimi e tuuvili atu le autusitala mo ni faamatalaga i se mataupu, ae o le taimi lea o loo pisi i isi
ona tiute.
O le isi mafuaaga o le faigata o le galuega a le sooupu ona o se faalavelave ua tupu muamua maua e tusitala ae e lei oo atu i leoleo, pe e lei logoina foi o ia e le vaega suesue ma le vaega o le auaunaga lautele i se faalavelave. O le faigata foi o le pitolaau a le sooupu ona o ia le leo o le matagaluega i le Komesina ma le pulega pe a tuuina atu i se tulaga faalauaitele se mataupu.
O loo iai le talitonuga o le autusitala o nusipepa, leitio ma faletelevise i lo tatou atunuu o le a iai se suiga fou i le pitolaau a le sooupu ua filifilia, ina ia faigofie ai le faatinoga o le latou galuega. “Pei o le tulaga faigata lava, o le fiu e saili se faamatalaga mai leoleo i se mataupu e manaomia ai se finagalo o le matagaluega, ae fiu e saili le sooupu e le maua i lana telefoni feaveai poo lona ofisa, ae talosia ia iai se suiga”.
O le lagona faaalia lea o se tasi o tusitala sinia ina ua mae‘a ona faailoa e le komesina le tofia o Fauono Tala Tapu e avea ma sooupu e sui tulaga i le afioga Leaupepe Fatu Pula ua malolo mai le galuega faaleoleo ina ua mae‘a lana konekarate 3 tausaga, ae ua lē toe filifilia.
