O le aso 17 o Aperila o le faafiafiaga mulimuli lea a le susuga ia Felise Mikaele i le taulaga faatau i Magele, ae o lona vaiaso na sosoo ai o le vaiaso tonu lea na pa‘ū i ai le ANZAC Day i le Aso Toonai na tupu ai le faalavelave i lea tamalii o le atunuu i Korokoro i Ueligitone i le mea o loo alala ai.
O le 7.30 i le taeao lava lea o le Aso Toonai na faalogoina ai e Lealaitagomoa Felise ua sui lana faalogo ua niniva lona ulu ma ua nenefu foi lana vaai. Sa ia lē mafaufauina o uiga ia o se ma‘i o le a oo ia te ia.
Na tulai ma alu i le fale taele (tulou) ma ia palasi ai loa i lalo ma pe atoa ai le isi ona itu o lona vae ma lona lima faatasi ai ma le lē mafai ona tautala. O le tina o le aiga ia Fay na malolo i le aso lea i lana galuega ma sa nofo i luga o le laulau ae na ia faalogoina le leo o loo valaau i lona igoa.
Na ia tulai ma savali i le fale taele ma ia vaai ai i se faalavelave o loo tupu i lona toalua, ua sau le piapia i lona gutu (se‘i tulou) ae ua ia leiloa foi se mea. Sa ia faia le gaioiga o le tu‘i tasi o lona tumuai ma ia vaaia ai loa ua amata ona te‘i mai. Na ia taumafai e vili le ambulance mo se fesoasoani ma taunuu atu ai lava i lena taeao le taavale laveai ma ave ai loa i le falemai i Lower Hutt ma taofia ai i le ICU.
O le suesuega ma le ripoti a fomai faapitoa o le stroke ia Dr Tom Thomson ma Dr Mohammed Abdulhamza na manino mai ai le maua o lenei tamalii i le gasegase o le Minor Stroke. O le faata o le fai‘ai MRI ma le CT scan o se poloka i se alatoto (blood clot) i lalo ifo o le ua, sa faapea ona maua atoa ai ma le niumonia.
Sa faatopetope ona togafitia i ni vailaau ma ni fualaau malolosi e kalepeina ai ni alualutoto o loo polokaina se alatoto e alu i le fai‘ai, ma sa faapena ona toe vave ona gaioi ai le vae ma le lima taumatau, ma mafai ona toe tautala lelei ai, pe tusa ma se 40 minute mulimuli ane.
Sa faaalia e fomai i lea ripoti, o le malosi o le tino o Felise i le tulaga tau le fitness, i le koleni ma le faamalositino, sa fesoasoani tele lea i le teteeina o le ma‘i o le minor stroke faatasi ai ma vailaau.
E 13 aso na faamalolo ai e le falemai lona tino, ma ua tea nei i tua ma le faatonuga malosi a fomai, ia aveese loa le anoanoai o mea o loo mafaufau i ai, ia malolo mai le musika, aua ne‘i toe pese ma isi mea i luga o le taleni mo se taimi, aua ne‘i toe ave taavale mo le masina, ia lava le moe, malolo ma tafao, ave se avanoa e malolo ai alatoto aemaise le mafaufau.
Ua taofi uma nei ana sponsors faafiafiaga ma koneseti ua uma ona faapolokalameina mo Ausetalia, Hawaii, ma USA, Samoa ma Amerika Samoa mo lenei tausaga e pei ona faatonuina ai e sponsors hall ma fale faafiafia.
Ae na faaalia e Felise a o lei oo mai le ma‘i, sa iai lava lagona o le tino sa ia faalogoina e pei e fou ma pei e faailoa mai ai e iai se mea o le a tupu, e iai le tino vaivai gofie, lē paleni le tino pe a momoe, niniva le ulu, vaivai le leo, itaita gofie ma le loto galo, o vaega uma ia na toe manatu i ai le susuga ia Felise Mikaele ina ua toe ola mai i lenei mai. Ma ua ia talitonu ai o loo alofagia o ia e le Atua ma toe aumai le isi avanoa.
O lona finagalo foi lea i lona atunuu o Samoa o loo fiafiafia e faafofoga i ana musika, e faapea o le a lepa i le foe ae mapu i le too, o le a seu i fanua le faatautaiga mo se taimi i se tautua faalelava ia te oe Samoa i se taleni ua foai fuaina mai e le Atua, se‘i toe faufau le vaa o le toeaina ua afatia i le tulaga i le malosi o le tino. Afai o le ā le finagalo o le Atua e toe foaiina le malosi ma le ola maloloina lelei, ona tatou toe feiloai lea i luga o au musika, ae afai e leai o lona finagalo foi lea.
Na momoli foi lona agaga faafetai i le atunuu i le nofo tatalo a o iai i le falemai i ona tiga aemaise o le Divine Mercy. A mae‘a se mea tatou te faia, ia tatou faapea ifo, o i tatou o ni auauna lē aogā.
