Falelauasi tamaitai talavou na maliliu i le faalavelave i Lano

O loimata ua lē utufia i le motusia faafuasei o le mafutaga pelē ma mamaē a mātua ma aiga o si fanau teine e toalua na maliliu ina ua tafea le pasi i Lano.
Na maua le avanoa e faatasi atu ai le sui o le nusipepa o le Savali e molimauina toe taimi o le fanau i le Aso Tofi, aso 11 Iulai 2013.
E ui o tamaiti i laua na maliliu ae na vaaia le tumutumu o le afioaga o Avao i le taimi o le falelauasiga o i laua na maliliu.
Na faataunuuina le sauniga i le Malumalu o le Ekalesia Metotisi i Avao lava. Na vaaia i totonu o le malumalu a o faagasolo molimau o i laua na maliliu le agaga ootia o le afioaga atoa i lenei faalavelave.
O le tofa Nafoitoa Talaimanu Keti o lē sa fai ma sui o le aiga o le tamaitai o Maria Aiaraisa e faamalamalama le tala atoa e uiga i le mea na tupu.
Na ia saunoa ai e faapea, o lona tuafafine e igoa ia Maria na sau mai Ausetalia, na sauni lona tina ma lona tuafafine o Maria e o i Savaii e asiasi i Avao i le latou aiga.
“O a‘u na vavaoa ma ou fai atu e nonofo ae o le a vili tamaiti e omai. Ua vili le telefoni ma talanoa ma lona uso o Aiaraisa ma fai loa i ai le polokalame ua lē o atu Maria ma le olomatua ae faaoso mai tamaiti.
“Ua ou toe valaau mai ia Aiaraisa ae tali atu Aiaraisa o tamaiti na ua o atu i le pasi e tuli atu le vaa o le 2.
“Ua fai fuafuaga mo le faataliga o tamaiti i le uafu pagā lea ua taunuu le vaa e leai nisi o tamaiti o ō atu ai.
“Na ou fesootai mai i le Ofisa o Leoleo i Tuasivi ma maua atu ai le tala o loo iai se faalavelave i se pasi ua tafea i le afioaga o Lano.
“Ua segia le mauli ma ua leai se faamoemoe, ua mautinoa i le loto le faalavelave ua tupu, pe tusa o le 5 minute na ou toe fesootai mai ai i le Ofisa lava o Leoleo i Tuasivi mo se update o le faalavelave.
“O le tali e faapenei, o loo iai le tamaititi e igoa ia Keki mai Avao o loo ola peitai o loo tau saili le teineitiiti e igoa ia Maria na la omai.
“O le mae‘a ai o le telefoni lea, na faatau pupula ai lo matou aiga atoa ua tau fai pupula to‘a mai ia te au poo le ā se tala.
“Na mautinoa i o latou loto le mea ua tupu ina ua ou tagi masūsū ona matou fetagisi ai lea ma fusifusi e foliga o ni tagata ua leai ni faamoemoe,” saunoa i ai Nafoitoa Talaimanu.
I le molimau a le tamā o Maria o ia o le uso o Nafoitoa Talaimanu le tamā ia Aiaraisa e faapea, o lona afafine lea soo se mea e alu i ai e muamua lava kisi atu ia te ia ma faapea atu I LOVE YOU  DAD ona faato‘ā alu ai lea.
“O le alu i le aoga e tamoe atu kisi ona faato‘ā alu ai lea pe alu foi i le lotu e faapena foi, ae pau lea o se mea ua alu i ai si ona afafine ua lē kisi atu e pei ona masani ai ona uiga, ai ona o le a alu e lē toe foi mai,” o le molimau lea a Aiaraisa ma loimata i le ootia.
O le tamaitai o Puataunofo Fuālaau lea e 5 tausaga le matua na fanau i totonu o le Kolisi o Avele a o avea ai le tamaitai o Aiga Esera ma Pule Aoga.
O le tina moni o Puataunofo le tina ia Lanuola sa nonofo ma le tamaitai o Aiga i le lotoā i Avele i le vaitaimi na fanau ai le tamaitai o Puataunofo.
O le aafia ai o Puataunofo i le faalavelave na malaga mai ma mātua o lona tina e omai i le Fono a le Ekalesia Metotisi ma faatafao ai Puataunofo ina ua uma le laugatogi e sili i le latou Vasega i le kuata lua.
Talofa ua lē tau moomooga faivavale ma le alofa faamatua ina ua afe le atua o le ala ma amia ai lona ola ina ua tupu le faalavelave i le afioaga o Lano, lea na tafea ai le pasi na malaga mai ai ma malaia ai le tamaitai o Puataunofo.
E avea ai lenei avanoa e momoli atu ai faamafanafanaga i aiga, mātua o uo ma ē masani a Maria ma Puataunofo; ia iā te outou le filemu o le Alii faatasi ma le Agaga na te faatonu folauina le tagata ua lē mautonu.