Taunuu le miti e fia ofu i le ofu uliuli, ma taalo mo le Olopeleki.
Taunuu le fia auai i le Ipu o le lalolagi taaloga lakapi.
Taunuu le umia o le fusi siamupini o fusuaga.
E leai se afaina o le tele o taleni ma agavaa, ma e tatau ai ona ona faailoa ma faaaogā ona o nisi ia o luitau aoga e avea ma faataitaiga lelei, ma feau aogā mo tupulaga o loo tauivi ma tausinio i ai.
O le tulai mai o le alo o Samoa, Sonny Bill Williams na te umia le fusi o le siamupini a Niu Sila i le taaloga o faipelega o le paga mamafa, e foliga mai sa matuā faigofie tele, pe a faatusatusa i le taumafai ma le tigaina o le toatele o isi tama taaalo sa latou tauasaina le tulaga maualuga.
E tele tausaga sa finau ai nisi mo le tulaga ua oo i ai le taumafai o SBW, peitai sa lē faamanuiaina ma o le toatele foi, ua oo lava ina malolo litaea, ma mavae atu le malosi e faaauau ai lea luitau o le olaga taalo, e lei oo lava pe na latalata foi i ai.
E iai nisi iloga o Niu Sila, sa vave ona toe liliu ese, ma suia isi paga e tausinio ai, ona o le faigata tele, ma le lē saili gofie o le fusi siamupini a Niu Sila.
O Sonny Bill Williams, o se tagata e talenia tele i le tulaga tau taaloga, ma e lē faailoga fesiligia foi ona agavaa e mafai ai ona faatino le tele o isi taaloga ma faagatama. Na amata mai i le lakapi liki, sa matuā tautaua lava, ona o ana gaioiga ma agavaa faapitoa sa tulaga ese mai ai i le tele o tama taaalo.
Ina ua agai ma suia i le lakapi lona faamoemoe, sa tulitulimatai foi e le toatele, pe moni ae pe faapefea foi lona fiafia i le lakapi, mai le liki sa lauiloa ai mai lona tamaitiiti seia oo ina tagata matua. I Ausetalia lava, i lona vaitaimi, sa maitauina ai pea lipoti a le autusitala ma le aufaasalalau, e uiga i le tulaga ese o SBW i le taaloga o le liki.
Ae ina ua alu ese ma tosina i le lakapi, sa amata tele upu faifai ma sa lē logo malie foi le tele o faamatalaga sa fai i ai.
Ae ui i lea, o se mea fua lava ia SBW le mau faamatalaga, ona o lona taumafai e faamaonia i le lalolagi, e tele ma anoanoai isi taleni o loo ia te ia, e manaomia le faalauiloa ma faaaogā tatau. E lei atoa se tausaga talu ona taalo lakapi, ae amata loa ona faalauiloa lona manaoga, e fia taalo mo le aulakapi tele a Niu Sila, le All Blacks.
O lona naunautaiga e lē gata ina fia auai i le Olopeleki, ae fia auai foi ma fia taalo i le tausinioga o le Ipu o le lalolagi i le tausaga na tea nei.
E lei umi foi se taimi na tausinio ma tuli ai lea manaoga e SBW, ae na taunuu lava ma maua i totonu o se taimi puupuu.
E tele foi ma anoanoai isi tama taaalo a Niu Sila ma le Pasefika ua leva ona tausinio, ma tuli lea moemitiga o le fia ulufale i le Olopeleki. Ae pagā lea, ua mae‘a o latou taimi, e lei ofu lava i le ofu lanu uliuli ma taunuu le manaoga sa tulituliloa.
Sa tele manatu ma finagalo o nisi, e oo lava i tagata Samoa lava ia, sa matuā faitio ma lē fiafia i le faaaogāina o taleni a SBW, ona talu ai o le taalo lakapi, toe taalo i fusuaga i le taimi e tasi. E manatu nisi sa tatau i le alii taalo, ona taulai ma tuli le manu e tasi, nai lo le ave lua o taaloga.
Tali SBW i le faaaogāina o ana taleni
Ae o le tausaga na tea nei, na feiloai ai le Samoa Times, ma le alii taalo ia SBW, faatasi ma nisi o lona aiga Samoa i Pt Chevalier i Aukilani. O le tasi lea o fesili sa tulituliloa ai le lana susuga, Poo fea tonu le taaloga o loo mamafa i ai lona manatu. Ae pe iai foi se aafiaga o lana lakapi, ona o le fusu?
Sa ata le alii ma faapea mai, e leai se faaletonu i le ave lua o ana taaloga, ona talu ai o lona manao, ia faasusulu pea taleni o loo ia e ia.
E lē tatau ona saisaitia ma taofiofi ona lagona ma ona manatu, pe afai ua iai se naunautaiga e faatino ai ma faaaogā taleni taaalo.
E oo lava foi i lona lava tamā ma nisi o lona lava aiga Samoa, e matuā lē fiafia lava ia SBW, pe a tautau sana fusuaga. E iai lava manatu e faapea, e lē fia vaai ma e lē fia maimoaina foi se taaloga a le atalii i totonu o le maea, ona o popolega e pei lava o le toatele o mātua.
A o le faamatalaga lava a SBW, e tumau pea ma faamautuina lona faatāuaina o ona lagona ma ona manatu mo le faaaogāina o taleni ma agavaa o loo ia te ia.
O se tasi o uiga sa maitauina i le alii taalo, o se tagata fiafia, ma o se tagata foi e mulimulitai i ana tala ma ona talitonuga, ma e selau pasene foi lona talitonuina o lona lava tagata.
Sa‘o le taimi, sa‘o le tumutumuga ma le faamoemoe e faaaogā ai taleni
E fesiligia mafuaaga e tulituliloa ma fia ausia ai e nisi tulaga maualuluga i taaloga.
O le misiterio lilo lea, ua na o le tagata lava ia ma le silafaga ati a le Atua, e manino ma malamalama lelei i lea tulaga.
Ae o le maitauina o uiga ma natura o mea o le soifuaga nei, e foliga mai o le faaaogāina o taleni a Sonny Bill Williams, ua sa‘o lona taimi ua faaaogāina ai.
E pei ona ta‘ua, sa lei umi se taimi sa tuli ai manaoga o le alii taalo, a o lea ua pale ma taunuu nisi o ana moemitiga.
O le a tulituliloa pea, poo afea e faataunuu ai le isi manaoga o le alii taalo, e pei ona sa ia faailoa i le Samoa Times, o lona fia taalo lea i le aulakapi a le atunuu, le Manu Samoa.
Ua tulimatia nei e le toatele le toe foi o SBW i le taaloga lakapi i le au a le Sifi i Waikato, mo le taamilosaga faalotoifale a Niu Sila, faapea le Super Rugby e pei ona faagasolo.
E lē gata i lea, ae poo afea foi o le a toe taunuu ai se lu‘i mai se alii fusu, e luiina ai le fusi, atoa ai ma lona puipuiina.
