I le faamanatuina o le maliu ma le toe tu manumalo a‘e o Iesu Keriso mai le tuugamau ma le oti i le taimi o le Eseta, o se vaiaso faatāuaina i le kalena a le au kerisiano, e lē gata o le manumalo o lo tatou Tupu o Tupu ma le Alii o Alii, ae o se vaiaso faatāuaina mo mafutaga ma fesootaiga a ekalesia e lē gata o sauniga tuufaatasi ae o taaloga ma mafutaga, faapea foi le tele o aiga sa faatino ai a latou mafutaga ma tuufaatasiga.
O se vaaiga foi lea i le ekalesia AOG Church of Samoa i le aai o Melepone e pei ona fai faatasi la latou sauniga o le Eseta a le latou faleono. O le taitai o le ekalesia i le setete o Vitoria o le susuga i le faafeagaiga ia Pastor Apouani Tapuala Unasa ma le faletua ia Olevia, o i laua foi o sui taitai o le ekalesia aoao i Ausetalia. Na mati‘e ma maualuga naua le sauniga faaleagaga aemaise o mafutaga sa faagasolo ona sa talimalo ma fai sauniga faatasi ma nisi o faafeagaiga ma o latou aiga sa asiasi mai Samoa, Niu Sila ma Amerika, o alo o se tasi o tina matua o le ekalesia na faailogaina lona aso soifua i le taimi tonu o le Eseta.
E lē taumate ua mavae atu lea vaiaso tāua ae ua maualuga le viiga o le Atua i le mafutaga soofaatasi a le faleono, aemaise o le feiloaiga ma malo faaaloalogia na afea le aai, aemaise o le mafutaga ma le ekalesia.
