O le faamanuiaga mo Fiva Faalau ma nisi o alo ma tamafanau Samoa sa faauuina i le Iunivesite o Massey i le vaiaso talu ai. O Dr Fiva Faalau, ua faauuina i le faailoga PhD, ae o loo ia tauaveina foi nisi faailoga maululuga ma le taualoa e pei o le BA, MA Hons, toe faaopoopo atu i ai ma le PhD e pei ona ta‘ua.
O le suesueina o le mafaufau i se mataupu taua i totonu o aiga, i le va o fanau, tupulaga talavou ma matua, o se mataupu taua tele sa mafua ai ona naunau ma faatauina e Fiva i lana sailigamalo. O le mae‘a ai o lona fesiligia ma suesueina o talavou e 45, sa ia mautinoa ai le taua tele o le iai o fesootaiga vavalalata i totonu o aiga.
Ua ia faaulutalaina ai sona finagalo e faapea, O talavou Pasefika, e manaomia so latou leo i totonu o aiga mo o latou olaga (Pasifika teens need voice in traditional family life).
O le saunoaga a Faalau e tusa ai ma se pepa o faamatalaga mai le Iunivesite i Massey, sa ia faamatala ai le uiga moni o lana autu e pei ona ia faamamafaina i le maea ai o se suesuega sa faia.
O lona finagalo faaalia e faapea, e manaomia matua ina ia faamalosia ona tuuavanoa e faafofoga ai i se leo o tupulaga, e ala i le talanoa ma faasoa, ma o se auala lelei tele e fesoasoani ai i le soifua manuia mo i latou i le lumanai, a o se itu lelei foi mo matua latou ia.
O le taua o fefaasoaiga, o le a malamalama ai matua i uiga o manatu, ma le uiga o tupulaga ma o latou manaoga faatalavou.
O le a maua ai foi ma le paleni i totonu o aiga Pasefika, e tusa ai ma tu ma aga a atunuu taitasi.
O le femalamalamaai o matua ma talavou, o le a fesoasoani tele lea e vaoia ma puipuia mai ai tupulaga i uiga leaga ma faaosoosoga paaa o le olaga e pei o le pule i le ola, o le ava malosi, ma le gauai i taupulega leaga e ono aafia ai o latou olaga.
I ona taimi a o aoaoina lea mataupu, e le na o le tulaga i le poto salalau o le mafaufau ma ona vaega taua, ae sa tele foi se taimi sa faaaluina e mafuta atu ai e faafesagai ma aiga ma tupulaga sa feagai ma faafitauli tuga ma le faaletonu.
O Dr Faalau, o ia foi o le Faatonusili o se tasi o auaunaga ua leva ona tautuaina tagata lautele i mataupu lava e patino i le va o tupulaga ma aiga, ia faapea foi faafitauli o sauaga i totonu o aiga e aofia ai ma tamā ma tina. O se agavaa ua leva ona mautinoa, ma faamonia e Dr Faalau i lona auai o se Faatonu o le auaunaga mo soo se tasi.
Sa ia faasoa foi le mafuaaga o le tulai mai o faafitauli i totonu o aiga Pasefika, e mafua ona o le itutasi ona faatino le galuega a matua.
Ua na o le faatonu ma faasino, a ua leai se avanoa e faafofoga lelei ai i se manatu aumai, ma le talanoa ane i ai o fanau.
O se faiga lava lea faa-Pasefika ua leva ona soifua ai aiga, a o lei malaga mai i Niu Sila. Peitai o lenei vaitaimi, ua telē lona eseesega ma ona suiga.
Ua tatau ona silasila totoa matua i nisi auala e pei ona aoaoina ma faamalosia i totonu o aoaoga i le va lava o matua ma talavou.
O ia auala fou, o le talanoa faatasi ma tuu se avanoa e faaleo mai ai manaoga ma manatu o tupulaga, latou te iloa ai le amanaia o i latou i totonu o aiga.
O Dr Faalau, na Malaga i Niu Sila ina ua faatoa sefuluiva ona tausaga i le 1986. O lona afioaga i Samoa o Vailele i Apia.
A o nofo ai i lona aiga i Niu Sila, sa luitauiina lona soifua i nisi o ona aiga sa maualuluga le tulaga o aoaoga ma galuega sa iai.
O le ala foi lea sa ia naunau ai e faatino pea le tulaga tau aoaoga e pei ona oo mai lava i le taimi nei.
O lana tautinoga, o le a le gata ai i lona tomai ma agavaa ua taulimaina i le taimi nei, peitai o le a faaauau pea ona galue malosi mo le unaia o lona talitonuga ma le mataupu, ina ia mautinoa se manuia mo aiga ma tupulaga Pasefika.
O loo avea Dr Faalau ma Faatonu o le Pasifika Health and Social Services i Mt Albert i Aukilani tutotonu.
O ona matua o Iliaia Faalau o Maagiagi ma Vailele, a o lona tina o Felila Faalau o Vailele ma Salani.
O se avanoa foi e momoli ai alofaaga o Dr Faalau mo lona Great-grandmother o se tasi sa tele foi sona sao i lona soifua tuputupu a‘e, ae faapea foi le susuga i le Faafeagaiga EFKS i lona nuu i Vailele Samoa.
