Faafetai Samoa ua mae‘a faalauiloa le CD a Lady Kiri (fafafine) “Tina Faialofa Luatapualei. O le faamoemoe ua taunuu o le Laau lea o le soifua.
O le po o le Aso Toonai na se‘i mavae atu nei sa matuā faatumulia ai vaega uma o le Community Hall i Otahuhu i le tatalaina o le uluai CD Volume 1 a le tamaitai poo le faafafine o Lady Kiri e pei ona lauiloa ai i Samoa ma Niu Sila nei le taleni o le pese.
E pei foi ona auina atu i se tala i le tatou nusipepa i le vaiaso talu ai, o se uluai fafafine foi lea ua pueina sana CD ma faalauiloa atu.
Sa tatala aloaia lava i se tamai sauniga puupuu sa saunia e le fofoga o le po, le faletua ia Sia Su‘a i le tatalo, ae lagiina e Lady Kiri le viiga o le Atua ona amataina loa lea o le polokalame e faafeiloaia le valaaulia ma le mamalu o Samoa sa lagolago atu e molimauina le faamoemoe o Lady Kiri.
Sa matuā faafiafiaina le mamalu o le atunuu sa o latou molimauina lea po i le mālie o tala, mālie ma nai ata pupuu a le faletua ia Sia faapea ma tifaga lalelei a Lady Kiri.
Sa faafiafia ai foi ma le au siva lauiloa a Le La o Samoa faapea le siufofoga matagofie o Mautoatasi Asuao ma le faaili o le Lili o le Vao lea o loo pese ai Kiri.
E momoli le agaga o le faafetai tele a Lady Kiri ma lona aiga i le mamalu uma o Samoa i le lagolago aemaise o le lagolago malosi a le faletua ia Sia Su‘a ma le La o Samoa Dancing Group & Sewing Shop i le faamatagofieina o lona faamoemoe.
Na ia ta‘ua, “O la le tusi ‘E sili le manuia o le na te foai nai lo le na te taliaina’. Toe faatutumu atu mea ua outou toesea e ala i seleni ona o le moni o lo outou alofa. Faamagalo mai foi se pati ua sala poo se faaletonu i lena po auā e poto lava le tautai ae se lava lana atuiama. Matou te faamanuia tele atu Samoa i o outou faiva alofilima i taleni ua foaiina o le Atua ia i tatou.”
O loo faatauina lenei CD i nofoaga masani a nisi o alo ma tamafanau a lo tatou atunuu i Niu Sila nei.
