O le susuga a le Faafeagaiga Samuel Gibbons ma lona faletua o Aveifo Gibbons ua avea nei o leoleo mamoe o le galuega fou a le Gracepoint Community Church Ipswich i Brisbane, lea na faatuina aloaia i le Aso Sa na tea nei, o se ekalesia ua totōina mai le Ekalesia a le Gracepoint Community Church Fairfield i Sini Ausetalia, o loo taitaiina e le susuga Ps Vili & Josie Aufai.
O le faamalu a ekalesia a le Auuso Kerisiano o loo faavae mai ai nei ekalesia, e pei ona iai nei o latou lala, e lē gata i Sini, Melepone, Perisipeni, Aukilani, Ueligitone, Kalaiesetete, aemaise foi ma Samoa.
E sili atu ma le 20 le aofaiga tuufaatasi o nei ekalesia.
O le lona tolu ai lea o ekalesia a le Auuso Kerisiano ua iai nei i totonu o Perisipeni, e pei ona auai ma lagolagoina le faamoemoe e susuga i faafeagaiga ia Sa‘u ma Tuuloa Lologa, ma le faafeagaiga ia Luamanu Schwenke ma lona faletua ia Sina.
Sa auai foi ma le susuga faafeagaiga Ps Mafi Mataafa ma le faletua ia Kalala mai le Ekalesia Gracepoint Community Church i Minchinbury Sini.
O le 12 i le aoauli o Aso Sa taitasi, o taimi amata ia o sauniga o le lotu fou, o loo latou faaaogāina le malumalu o le Ipswich Gospel Hall i le tuatusi 76 Thorn St, Ipswich.
O le susuga Samuel o ona alalafaga o Apia Park ma Fagaloa, ae o le faletua ia Aveifo o lona alalafaga o Salelavalu.
