Ua talotalo mai aao o le faailoga o le faatofa mai o faipule e to‘a 49 o le paeaiga faapalemene lona 15 a le Malo Tutoatasi o Samoa lea ua talai o latou ofutau ina ua iu manuia galuega o le lima tausaga o le paeaiga ua faamuta nei.
O le fesili masani poo ai o le a toe foi i le Palemene, ae o ai o le a fai se malologa pe a lē toe tusi aao i ai le itumalo. O foliga o le faanoanoa i sui mamalu ona o le mafutaga faafaipule o le fono aoao faitulafono o le a motusia, ae o foliga foi o le fiafia o nisi faipule o loo mafanafana o le a toe tui mai lona peleue ma sele mai lona fusiua auā o loo lagona le mafanafana o le lagolago pea a le itumalo.
O le malelega a le Ao o le Malo na lologo faatutuila ai le maota e le gata i faipule ae o Ulu o Matagaluega a le Malo, sui o Malo mai fafo, nisi o le aufaigaluega a le Atua, o aiga ma uo faapea le aufaigaluega a le Fono Aoao Faitulafono.
Na vivii e le malelega nisi o atinae ma galuega a le paeaiga ua mae‘a aemaise o galuega a le faigamalo. O le lipoti o aiātatau o se tasi lea o galuega sa nafa ma le Komesina o Sulufaiga na iloga ona mamafa i ai le malelega a le Ao Mamalu o le Malo.
O le tāua o lea lipoti ona o loo faamamafa ai le tāua o aiātatau o tagata aemaise o le aiātatau e lē tatau ai ona aafia le soifuaga faaletagata i ni faaletonu.
O le tausisia o le tulafono faavae, tasi lea o vaega na afea i le malelega ona na malele le Tama Aiga ma ia faamanatu mai le tāua o le tatau ona iloilo lelei o mataupu e faasino i ni suiga o le faavae, auā o le faavae taoto ma le faavae popo na faataoto e mātua ma tuaa e lima taitaiina ai taitai o le Malo ma le atunuu ina ia maua e tagata uma se soifuaga manuia ma fiafia aemaise o le saogalemu.
O le tatalo faafetai na filifilia i ai le Faipule o Lefaga ma Faleaseela, ae o le taitai o le Itu agai na saunia le tatalo o faatoesega. O le faipule o Aana Alofi Numera Tasi o le tatalo o manaoga.
O le Fofoga Fetalai na saunoa faafetai i le mamalu na auai aemaise o le Ao o le Malo ma ē uma na auai e pei o le Faamasino Sili ma le vasega o alii ma tamaitai faamasino.
