E toatele e lē o talitonu e 259 moliaga ua faia e leoleo faasaga ile afioga ile Komesina o Leoleo le afioga Fuiavailili Egon Keil. Na salalau se lipoti na toe faasalalau e nisi i luga o fesootaiga televavave ole facebook na faailoa ai lea aofaiga o moliaga.
I sailiiliga ale Samoa Times na fesiligia ai se tasi o leoleo sinia oloo i totonu o suesuega e fanau mai ai moliaga ma ia ta‘ua ai e sa‘o ole aofaiga lea. “E 300 moliaga ae na toe aveese isi moliaga ona e iai mafuaaga ma totoe ai le aofaiga e 259.
E 120 moliaga ole tauaveina ose laau malosi e lē faatagaina faaletulafono.
E 120 isi moliaga ole umia ose a‘upega e lē faatagaina, 8 moliaga ole faia oni gaioiga ma le faamoemoe e faamata‘u ai se tagata ise auala solitulafono, 6 moliaga ole lafo oni upu taufaamata‘u, 2 moliaga ole lafo oni upu taufaifai, tasi le moliaga ole taumafai e faaoo le oti, tasi le moliaga ole taufaaoso e faaoo le oti, ma le moliaga e tasi ole council murder ma e lei maua se faaliliuga tonu ile gagana Samoa ole moliaga mulimuli e atoa iai le 259 o moliaga faasaga ile Komesina.
Ole aso na taofia ai le Komesina, e 11 moliaga na taofia ai, peitai ina ua mae‘a suesuega a leoleo na logoina ai le Komesina ile Aso Lua ua mavae e manaomia le oo atu ile ofisa o leoleo i Apia mo le logoina uma iai o moliaga, peitai na faaalia ele leoleo sinia oloo iai ile suesuega, e lei mafai ona oo atu le Komesina ae o lana loia le susuga Komisi Koria na oo ane ile ofisa ma faailoa iai le aofaiga o moliaga ua iai nei.
O moliaga ole umia ma le tauaveina ose laau malosi e lē faatagaina faaletulafono e mafua mai ise laau malosi na tauave e lē ua molia ile 3 ile 4 masina amata mai ile masina o Me 2016 e oo mai ile masina o Setema 2016.
O moliaga ole taufaafefe ise auala solitulafono, ma le lafo o upu taufaamata‘u ma upu taufaifai e mafua mai ile aso na taofia ai ile vaaiga a leoleo.
O moliaga ole faaoso e faaoo le maliu ise tagata, taumafai e faatino se gaioiga e faaoo ai le maliu e mafua mai ile osofaiga a leoleo i Faleatiu ile masina o Aukuso ole tausaga nei, lea na ia faatonu ai se alii leoleo taailua e fana se tagata sa iai ile taimi ole osofaiga tau laau faasāina.
O lea alii leoleo na ia faia se lipoti ina ua mae‘a mai le osofaiga ma ave i taitai leoleo ma faailoa ai lea tulaga.
Ole alii leoleo taailua foi lea na faaulu lana tagi faasaga ile Komesina lea ua mafua ai ia moliaga.
Ole amataga ole vaiaso nei na valaau ai moliaga mo le valaauga muamua ma e tuuina atu lenei lipoti mo le faasalalauina e lei maua poo le ā le taunuuga ole valaauga muamua o moliaga ole afioga Fuiavailili Egon Keil oloo faamalolo lē tumau ile taimi nei, ma ole faalua ai lea ona faamalolo lē tumau le alii Komesina.
O isi ona moliaga sa molia muamua ai ua faaui i tua ma faaleaoga ele faamasinoga ona ole talosaga ale loia mai Niu Sila na aumai faapitoa ele Loia sili e tulai e finau moliaga.
O lea talosaga na faaalia ai ele alii loia o Paul Dacre e lē talafeagai molimau e lagolago ai moliaga ia e fā na muamua tulai ai le Komesina o Leoleo. O lona toe foi ile galuega na toe molia ai i moliaga e 259.
Ole aofiaga o moliaga oloo ta‘ua ile lipoti lenei oloo teena ele Ofisa Sili o Faamasinoga, e pei ona lomia ele Talamua, peitai e lē o mafai foi ona faama‘oti mai ele ofisa o Faamasinoga pe fia tonu le aofaiga o moliaga ole Komesina. Atonu ole a maua lava le sa‘o pe a valaauina le mataupu.
