Faatea Tuiloma Taamale mai le faiganuu a Sapunaoa

E lei talia gofie ele tofa Tuiloma Taamale le finagalo o alii ma faipule na tu atu ai le tootoo ile lua vaiaso talu ai, e faatea o ia ma le nuu. E mafua ai ona ole faamasinoga faalotoifale e faasino i lona lava aiga. E le gata ua faamatalaina ele tofa a Tuiloma, ose osiganuu pule ma le saua, e mafua mai ona o tulaga tofi, ua umia e nisi ole latou aiga.

Ole pule foi lena ua mafua ai ona finagalo alii ma faipule e pei ona faaalia e Tuiloma e faatea ese ia ma le osiganuu, ona ua aaitui ile Sui ole Fono a Sui Tofia. Ole mafuaaga lena na afua ai ona masii atu se tasi o loia ma lana aufaigaluega e asia lenei aiga, ma faia ai a latou pesepesega ma tatalo faatasi ina ia maua pea le filemu ole Atua, e faatoafilemu ai tulaga faigata ua aafia ai finagalo ole aiga.

E faapea foi se mataupu oloo aafia ai se tasi o suafa mai le afioaga o Falelatai, ua mae‘a ona faia le faaiuga ale faamasinoga e faaa‘e ai ile faiganuu, ae peitai oloo faauluulu mamau pea le tofa ma le faautaga a alii ma faipule, ile faapea mai e tatau ona totogi atu le lua afe tala.

Ose togisala ua lē gafatia ele tamalii, oloo taofia lona suafa ile taimi nei ona ole manumanuga ne‘i tulai mai nisi o fita ma tiga, e lagona ai le masimasi ma le fealasi o lagona ole fia taui ma sui ma le finauga o aiātatau e pei ona taumafai atu iai.

Oloo manino le tulafono oloo faafoe ai le pulega a nuu, e pei ona faaalia ele afioga ia Lemalama Taaloga, ole sui ofisa sili ole matagaluega o pulenuu faapea tina ma tamaitai ma aga fesootai. E tatau i afioaga ona lesitala a latou tulafono faalenuu, ina ia mafai ona aloaia ai pe afai e faia ni a latou finauga i luma ole faamasinoga o fanua ma suafa.

E le gata ole a fesoasoani i osiganuu ma faigamalo lelei, ae taofia ai ni faafitauli mai le tulai mai ona fevesiaiga, e pei o tu ma aganuu masani, ole mu ole foaga, pe oo ina maliu ai se isi.

Ole mataupu lava latou i Sapunaoa, o lea ua toe faafoi mai ile faamasinoga, ma ua agai ina fai iai ele faamasinoga maualuga sana faaiuga. Ile faaaogā sese ole pule, ua tuliesea ai le aiga lenei mai totonu o latou fanua ma o latou faasinomaga.

Seia vagana se mataupu matuia e aafia ai tu ma aganuu faasamoa, pei ole faasiotia ole tagata, poo se tagata ua sosola ma se faletua ose faifeau, poo se matai ole nuu, ona faatoa mafai lea ona tu se tootoo e faatea ai sea aiga mai le osiganuu.

Ile finagalo ole Susuga ia Maae Lotelika II, ole nuu lenei o Sapunaoa, e le siligia le tofa i aiga aemaise lo la toalua ia Tuiloma ma Taituuga.  A afa e tasi le tofa ma saga eseese ile saofaiga aemaise le falefitu, e leai se finauga e faia. O tu ma aga ia ale afioaga. O nei aso ua ese. Ua aliali mai le aiātatau, ua faalala mai le pule, e le gata i eleele, ae faapea foi i tagata. Ole ā ea se fofo o nei faafitauli?

E pei ona faaalia ele tamalii mai Falelatai, ile aulotu oloo lotu ai e fesoasoani mai ile sailiga o lana sala e lua afe, ua lē lavā ona faatafetafea ile ala e foliga mai e leai sona faasinomaga. O Falelatai e le faasilitofo iai se isi, e manino lava le atunuu i talafaasolopito o mea na tulai mai ai i aso ua mavae.

O mataupu ia e tatau ai foi ona matuā silasila lelei iai taitai ole atunuu ina ia mafai ona foia e ala ile soalaupule ma ia tafiesea faiga ia faaituau ma faailogalanu. Aua ne‘i pei Samoa o isi atunuu, e vevesi ile ao ma le po ma lē maua se toafilemu, e pei ua lē faavae Samoa ile Atua.