O aiga ma uo aemaise o sui o le Malo na agai uma i le falefono o le Maota o Tui Atua Tupua Tamasese Efi i Sogi i le faaiuga o le vaiaso e molimauina se sauniga tāua ua toe faamautu ai le tofi sui o le Fono a Sui Tofia i le Afioga Tuimalealiifano Vaaleto‘a Sualauvi II.
O se sauniga ua faia i le mae‘a ai o le filifiliga a le Malo ma le Palemene o Samoa e toe faaauau e le afioga Tuimalealiifano lea tofiga maualuga o le atunuu.
E na o ia lava o loo seei i le Fono lenei a Sui Tofia, ae o nisi sa iai ua tuua le malo. O le filifiliga o Sui o le Fono lenei e fai mai i Tama Aiga o le atunuu. O le auga atoa o lenei tautua ina ia lagolago i le galuega a le Ao o le Malo ma o i latou foi e i totonu o le fono lenei e mafai ona fai mai i ai le filifiliga i le suiga o le Ao o le Malo pe a avanoa lea foi tofiga maualuga o le atunuu. O le afioga Tuimalealiifano e ala i lenei tofiga, o le a faaauau ona tautua i le isi lima tausaga. O le aiaiga o le tofi e toe palota le tulai mai e le Palemene pe a mae‘a le umi e ta‘i lima tausaga.
O se auauna lenei ua tele tausaga o galue o se Tausi Mavaega aemaise o le faatautaiga o lana tautua o se loia i totonu o le atunuu. O lea la ua toe tulai mai o le Sui Ao o le Malo o Samoa. O lea lava sauniga na faatautaia ai foi ma le faatautoga o nisi o Ofisa Sili o le malo. Ta‘ua e le alii Palemia o nisi e fou i le tofiga o lea na tuu i ai le taimi e nofo vaavaaia ai ina ia mautinoa le tulaga ua iai nei e faaauau mo le konekarate ta‘i tolu tausaga e pei ona faamalosia ai.
O nisi o Ofisa Sili ua toe faafou a latou konekarate ae o isi e fou i le tofiga ma o lea la na faatauto uma lava i le sauniga lea na amata i le faatautoga o le sui o le Fono a Sui Tofia.
O le fautuaga na avatu e le taitai o le Malo le Susuga Tuilaepa Lupesoliai Sailele Malielegaoi i lea sauniga, ia faia galuega ma le faamaoni auā le lelei o le atunuu i le savaliga faaauau a Samoa ma ona tagata.
