Ole mae‘a ai ole fonotaga ale Komiti ole Palola (Parole Board) na faaiugafono ai le lē toe tatalaina o alii ma tamaitai pagota i tua ile faaiuga ole vaiaso i lalo ole Palola, ae ole a faatasi ile masina. O lea faaiuga na faia ona ole tele o fafitauli ua tulai mai i nisi pagota e Aso Sa i tua lea e toe molia mai ile toe faia o nisi soligatulafono i taimi ia e o ai i tua i aiga.
Ole faaiuga ua faia nei ua lava le tasi ile masina ma tatala mai pagota e asisai i aiga, na autasi iai le komiti, lea e taitaifono ai le afioga i le Faamasino Sili, ia Patu Tiavaasue Falefatu Sapolu. O lea faaiuga na faamamaluina ile masina nei. Na faaalia mai ese sui ole komiti, ole tele o lipoti mai aiga ma tagata i nisi o pagota e malolo atu i tua, latou te lē tausisia tuutuuga oloo tatala ai i latou i tua. Ose tasi o ia pagota o se tamaitai oloo tuli sona faasalaga ile taufaavalea male gaoi. Na faaalia mai, a alu lea mafine i Aso Sa i tua e lē nofo i lona aiga, ae nofo ile fale ose aii oloo la faapouliuli.
O tuutuuga ole tatalaina o i latou i tua, e na o lona aiga lava e nofo ai e sa ona tafao i falekalapu poo le asiasi foi i nisi aiga, ae na o lona aiga lava. Na faaalia mai foi e iai foi tiute tauave a leoleo e faia ia i latou ua tatala i tua, o le asiasi lea i o latou aiga, poo nonofo ai mo le faaiuga ole vaiaso.
Ai la le mafine lea, ua faalua ona asia i vaiaso e alu ai i tua, e lē moe i lona aiga. O lea faiga ua talisapaia foi ele toatele ole atunuu, lea ua amata ona fefefe i nisi o pagota ia e agai mai i tua ile faaiuga ole vaiaso ona ole lamatia ai olo latou saogalemu.
