Ua fiu fesili i le sooupu o le Matagaluega o Leoleo e faailoa mai poo ā mafuaaga o le taofia e leoleo o le Minisita lagolago o le Matagaluega a le Palemia ma le Kapeneta le afioga Peseta Vaifou Tevaga‘ena, ae na pau lava le saunoaga a Su‘a Tiumalu Muliaga, o le Loia sili a le Malo o loo iai uma faamatalaga o le mataupu.
O le faamatalaga mai foi a le sooupu ua uma ona faia se poloaiga mai le faamasinoga ua faasā ai ona faasalalau se faamatalaga agai i moliaga o Peseta. Na fesili le tusitala pe aisea ua faia ai faapea lea mataupu o loo aafia ai se faipule o le Palemene, ae o isi moliaga solitulafono sa molia ai nisi o Faipule ma Minisita e aofia ai le sui Palemia sa faasalalau ma faailoa e leoleo. E leai se tala a le sooupu ae na o le faamalie mai i tusitala na fesiligia le mataupu i le feiloaiga ma le aufaasalalau i le Aso Tofi ua mavae.
O le faasalalau ai e nisi o faletelevise ma nusipepa o le molia o le Minisita lagolago, na aumai ai se faamatalaga faalauaitele mai le loia o loo tauaveina moliaga o Peseta le afioga Leulua‘ialii Olinda Woodroffe.
O le faasalalauga lenei mai le loia:
“Ua faatonuina Leulua‘iali‘i Olinda Woodroffe, o le ofisa loia o Woodroffe Lawyers e Peseta Vaifou Tevagaena, e na te fofogaina atu i tusitala Samoa uma se tali a Peseta Vaifou Tevagaena (‘Peseta’) i ni moliaga a leoleo, e faavae i luga o ni tuua‘iga lē sa‘o, lea ua faaalu i le televise, faaalu i tusitusiga a Nusipepa.
“E matua teena lava e le Afioga a Peseta nei tuua‘iga lē sa‘o, ma nei tuua‘iga, e leai ni faamaoniga, ua faia e leoleo.
“O Peseta o ia o se tasi o pule (Director) ma le tagata ua tuu ana tupe i totonu o le Kamupani (Shareholders) o le “Local Partners and Associates” o lea Kamupani latou te faatauina i fafo le sua o le nonu.
“Sa faavae lenei kamupani e ta‘ua i luga, ona o tupe na maua i le faaaogāina o se fanua tele o se isi kamupani a Peseta, e nono ai tupe e fai ai galuega a lenei kamupani.
“E matuā teena lava e Peseta ia moliaga e lua, a leoleo.
“E matuā telē le afaina o Peseta, lona itumalo, faapea ma lona aiga i nei moliaga lē sa‘o ua faia e leoleo, ma tala sese lea ua faasalalau.
“Ua mae‘a suesuega auiliili aloaia a le ofisa loia o Woodroffe Lawyers i luga o pepa ma tusitusiga aloaia ia ua io latou luma, ma ua matuā faate‘ia le ofisa loia lenei i le faiga e leoleo o nei moliaga, e ala mai i luga o faatonuga a le ofisa loia sili (Attorney General) ma le aunoa o ni suesuega auiliili i luga o tulafono tusitusia, ma aunoa ma le faaaogāina o le tulafono tusitusia a Samoa, o loo faatonu ai galuega a leoleo, ma galuega a loia, ma loia a le ofisa o le Loia sili.
“E iai foi tiute o leoleo ma le ofisa o le Loia sili e puipui ola o tagata Samoa mai i ni moliaga sese. E tatau ona fai ni a latou suesuega auiliili, ma lava ni faamaoniga moni ma sa‘o i le tulafono, e faavae ai se moliaga.
“I suesuega ma aiaiga auiliili a Olinda Woodroffe ma lona ofisa loia, i pepa o loo ua io latou lima i le taimi nei, ma aiaiga aloaia o le tulafono a Samoa ma isi atunuu, e faamaoni i nei suesuega e leai se suesuega loloto ma auiliili na faia e leoleo.
“E matuā leai ni suesuega loloto ma auiliili na faia e le ofisa o le loia sili a Samoa. O suesuega nei, lea e faavae ai manatu aloaia o Olinda Woodroffe ma lona ofisa loia, lea na faaali ia Peseta, ma mafua ai ona tusia nei tusitusiga.
“Tainane le loloto ma le matagā o lenei moliaga ua ta‘uvalea ai Peseta ma lona aiga ma lona itumalo, e aliali mai, e lei faatāuaina e leoleo ma le ofisa o le Loia sili, le afaina o Peseta ma lona itumalo ma lona aiga, i nei tuua‘iga sese.
“O le asō, ua uma ona ave aloaia ai le tusi a Olinda Woodroffe e 38 itulau i le ofisa o le Loia sili ma le ofisa o leoleo e ta‘u i ai, o tuua‘iga e lua o Peseta, e matuā lē sa‘o, ma solitulafono auala na faia e leoleo, i le lē suesueina aloaia o tuua‘iga, a o lei molia Peseta i le tulafono.
“I lea tusi e 38 itulau, ua tuu ai e Olinda Woodroffe i le Komesina o leoleo ma le Loia sili se avanoa e tau i le 12pm i le Aso Faraile aso 27 Novema, e faasa‘o ai a latou mea sese, ma toe ave i tua tagi ua fai e leai ni faamaoniga, ae faatoese aloaia ia Peseta, lona aiga ma lona itumalo.
“A tea le taimi lea ua tuu i leoleo ma le ofisa o le Loia sili ae lei faia ni laasaga e faasa‘o ai a latou mea sese ua fai ia Peseta, o le a ave aloaia loa tagi a Peseta i luga o le tulafono e faasaga i leoleo ma le ofisa o le Loia sili.
“O le tala a Peseta, na te lei faia nei mea pepelo ua tuua‘i pepelo ai ia. O loo i lana loia faamaumauga uma e faamaonia ai ana faamatalaga nei.
“Tusia e Leuluaialii Olinda Woodroffe, Senior Partner, Woodroffe Lawyers, loia a Peseta. Faafesootai mai le matou ofisa pe a iai ni fesili.”
Na pau le faamatalaga na mafai ona faailoa mai e leoleo i le mataupu lenei. o le aso 14 o Tesema 2015 o le a valaau ai moliaga e lua o Peseta i le faamasinoga.
