“Ua ou faanoanoa o le a lē tauva le sui ta‘ita‘i”..Tuilaepa
Ua mate‘ia nei le tupua sa natia i nai masina, poo le ā tonu le finagalo o Misa Telefoni i lona faamavae ma le tofi o Falelatai ma Samatau e lē toe tauva i le palota.
Sa fono le faafaletui o le HRPP i le lua vaiaso ua mavae ma faailoa mai ai e se tasi o sui sinia o le pati, o loo iai lava le suafa o le Laau na Fausia i le lisi o sui tauva o le HRPP ma o lona uiga e faaauau lava ona tauva.
Peitai o le Aso Gafua, 7 o Fepuari 2011 na amata lesitala ai sui faatutu o le palota, ae o le aso Lulu, 9 o Fepuari 2011 na feiloai ai le afioga Misa ma le ta‘ita‘i, le afioga i le Palemia ma faailoa i ai lana faaiuga o ia o le a tapuai e lē alu i le faiga filifiliga a lona itumalo.
Faaalia e se molimau faatuatuaina o le faigata o le faiga filifiliga a Falelatai ma Samatau i le taufai malolosi uma o sui tauva, o le mafuaaga lea o le faia o le faaiuga a Misa e sili ona tapuai.
E fua lea tulaga i le faiga faavae a le HRPP e faamuamua le sui o loo tauaveina le nofoa o le itumalo, ae a finagalo malie i ai lea sui ona tauva uma lea o isi i le fu‘a a le vaega faaupufai.
Peitai na ta‘ua e le molimau e lē o iai foi se lagona o isi sui tauva e toatolu a le HRPP mai Falelatai ma Samatau e toe faaui i tua lo latou faamoemoe ona o loo fia tauva lava.
O le itu lea sa pito faigata ai se faaiuga a le Laau na Fausia ma faia ai lana filifiliga e lē tauva i le palota.
“O le a nofo tapuai i le faiga palota aoao a le atunuu o loma nei i le masina o Mati, 2011, le afioga i le Laau na Fausia, le Afioga Misa Telefoni” o le finagalo lea o Tuilaepa i se pepa o faamatalaga.
“O le a lē avea ia o se Sui Tauva mo lona Itumalo Faaalalafaga e pele ia te ia, o Falelatai ma Samatau, o le paia lava lea i le Aiga Tau Aana ma le latou Tama, le Mamalu ia Falelatai ma le Tula o Salogo.
Le paia i le afio o le Falefa o Usoalii ma le Gafa, Afio o le Tamaitai, le Ma‘opū ma Leulumoega”.
“I le finagalo faatamalii o le Afioga ia Misa, o lona lē avea ma Sui Tauva, o le a faatumauina ai pea le maopoopoga filemu ma le fealofani o lona Itumalo, le Itumalo ua iloga lana faaeaea ia te ia i tausaga e tele na avea ai o ia ma o latou Sui i le Palemene o Samoa.
E lē gata i lea, o le a faapea ona avanoa ai nisi o tamalii ma failauga o le Itumalo mo le Tofi o le Itumalo i le Fono Aoao Faitulafono o le Malo Tutoatasi o Samoa”.
E tele tausaga o tautua le Afioga Misa i le Palemene o Samoa ma tagata o le tatou atunuu i le avea ai o ia ma Sui Faipule o le Itumalo Faaalalafaga o Falelatai ma Samatau.
A o avea o ia ma Sui Faipule, sa iloga matati‘a maualuluga o tofiga o le Malo sa ia seei ai. Sa avea o ia ma Minisita o Faatoaga ma Faigafaiva ma Vaaitau i le Faigamalo a le Afioga Tofilau Eti Alesana mai i le 1992 – 1996.
Sa toe tofia foi i le tofiga Minisita o le Soifua Maloloina mai i le 1996 – 2001.
O le tausaga e 2001 sa tofia ai o ia e fai ma Sui Ta‘ita‘i o le Vaega Faaupufai a le HRPP seia oo mai i le tausaga nei, 2011 ma, o tausaga foi ia sa ia umia ai le tofi o le Sui Palemia.
Ua lauiloa foi le Afioga Misa Telefoni i le tele o Tofiga Faavaomalo sa ia umia a o avea o ia ma Sui Usufono o le Palemene o Samoa, e pei o le filifilia ma Peresitene o le Faalapotopotoga o atunuu o Asia, Karipiane ma le Pasefika ma le Iuni a Atunuu o Europa (ACP-EU).
O nei tofiga uma sa tauave e le Afioga Misa i le agaga vilitai ma le lotonuu faamaoni ma atagia ai le faatuatuaina o ia e le Vaega Faaupufai a le HRPP ona o lona agavaa ma ona tomai.
Na faaalia e le afioga i le Palemia lona faanoanoa ona o le a lē avea le Afioga Misa ma Sui Tauva mo le faigapalota o loo loma nei, ina ua lē atoa tupe i le fala ma ua lē atoa foi nofoa o le sā o le Vaega Faaupufai.
Ui i lea, sa feofoofoai le afioga i le Palemia ma le Afioga Misa mo ni faamanuiaga e tō mai lagī mo le Malo o Samoa a o agai atu i le lumanai.
