E ui lava o loo tautala le Tusi Paia i aso o lo tatou olaga e puupuu ma saasaa, peitai o aso e faapine ma faailoga ai ni mafutaga ma ni feagaiga tāua, o aso e sami ai ma faaee ni tofi poo ni faailoga, o aso na o le a lē taitai ona puupuu pe galo i mafaufauga ma lagona, seia oo mai le oti.
E faapena le Aso Toonai, aso 30 o Aperila 2011, e mautinoa o le a lē mafai ona galo i le ulugalii fou, o Sonny Ah Ching ma lana manamea, le tamaitai o Nora Ah Ching, auā o le aso lea na faapaiaina ma faamauina ai le la feagaiga i luma o le Atua ma molimau e toatele, ina ua faaleo ma tusitusia a la tautoga ma fesuluai a la mama, o le faailoga ua avea ai nei i laua ma tane ma avā ua faaipoipoina.
O le susuga i le faafeagaia, Rev Elder Tavita Taulealo na taitaia le sauniga ma faapaiaina le faaipoipoga a le ulugalii fou, ma sa faia i malumalu o le ekalesia EFKS i Papakura.
Na mae‘a le sauniga, ona alo atu loa lea i le taumafataga matagofie ma lava saunia sa tapenaina i le Clevedon Community Hall i Papakura, lea sa faatautaia e le susuga Peter Crichton.
O tuaa o le alii faaipoipo o Sonny, o le susuga Pastor Ulaula Ah Ching ma le faletua ia Anna Ah Ching, ae o le tamaitai faaipoipo o Nora, o le alo o le susuga Sefo Sauileoge ma le tina ia Viena Crichton.
Momoli atu ai faamanuiaga a oulua aiga, o mātua, uo ma lua paaga uma, i lo oulua aso fiafia, ma ia avea la oulua faatasiga o se ulugalii, o se mafutaga e viia ai le Atua.
