O le sauni ai o le lalolagi e faamanatu le Kerisimasi e lē o nofonofo ai le taitai o le ekalesia Katoliko i Samoa i le faia o tapenaga uma ma polokalame mo tupulaga talavou.
O le valu aso o pesepesega o le Kerisimasi na faaiuina i le Aso Sa na tea nei, ae na aofia ai ma le savali o le Kerisimasi le Xmas parade na faataamilo i le taulaga i Apia sa aofia ai ma taavale teuteuina matagofie sa faailoa ai le agaga o le Kerisimasi.
O le faamoemoe foi lea a tupulaga o le Katoliko na faatāua ai ma se tasi o mau tauave o lenei tausaga o le tafiesea o le ola mativa e pei ona taulamua ai le faalapotopotoga o le Caritas a le ekalesia Katoliko aoao i le lalolagi.
Faaalia e le afioga Patele Muliau Stowers, o le tolu lenei o tausaga o faia le sauniga lenei i le faamoemoe e aveese mafaufau o le tupulaga mai faafiafiaga o aso fiafia e pei o pati ma inuga avamalosi e aafia ai i puapuaga ma faalavelave. O se polokalame foi e failoa atu ai i tupulaga le fiafia mamā e saogalemu mo i latou. E fā vikaliatu poo sinoti ua vaevaeina i ai tupulaga talavou o le ekalesia, ma o le vaiaso nei o loo faia ai lava polokalame faapea a tupulaga i Savaii.
Faaalia e Patele Stowers ua ese nei aso ua saoasaoa le olaga o tama ma teine talavou ona ua tele mau mea faafiafia aemaise o fesootaiga televavave faaonapo nei ua naunau latou te fia maua ae ua aafia ai i nisi faaletonu.
O le savali o le kerisimasi o se tu ma se aga o loo faia e atunuu o le lalolagi e olaola tele le sipili o le kerisimasi ma ua faapena foi ona faaolaola lea tu e le ekalesia auā e momoli atu ai se feau faaleagaga i loto o tupulaga talavou ma aveesea ai mai nisi mafatiaga e ono oo i ai ona o fiafia o le faaiuga o le tausaga.
O le faatinoina o lenei polokalame a le ekalesia sa lolofi atu ai le toatele o le atunuu e maimoaina a o faagasolo le savali i magaala o le taulaga o Apia.
O le saunoaga a le afioga i le taitai o le ekalesia na ia tuualalo ai i tama ma teine talavou i le faatāua o aoaoga faakerisiano e ola ma soifua ai, auā o le saogalemu foi lea o le sauni atu i aso fiafia ma le faamanatuina o le afio mai o pepe o le kerisimasi.
Na faatāua ai foi e le taitai le mau tauave o lenei tausaga i fuafuaga a le Caritas o se faalapotopotoga a le ekalesia e faia galuega fesoasoani, i le foia o le ola mativa o tagata o le lalolagi.
