E 25 tausaga o tauave ma galue mai le afioga ia Aiolupotea John Roache i Iuni lakapi a Aukilani Samoa, mai le tausaga e 1992 seia oo mai lava i le taimi nei.
E 2 tausaga sa amata galue ai i totonu o le Iuni i ana polokalame faatino seia oo lava ina filifilia i le tofi peresitene lea ua 23 ai nei tausaga o lana nofoaiga.
O le lagona o le afioga ia Aiolupotea John Roache, ua tatau ona ia faasee tuagalu, auā ua lava ia tausaga e tele sa galue ai i totonu o le iuni i lea tofiga, ae ua tatau foi ona pasi le fu’a i nisi o tamalii o le atunuu ua iai foi le tomai ma le agavaa i lea tulaga tofi o le iuni auā ua leva foi ona galulue, ma le isi vaega o le komiti faafoe o le iuni lakapi a le Aukilani Samoa, o tamalii Samoa uma o loo latou tauaveina.
E leai se vaega o faaletonu ua mafua ai ona ia tuua le tofiga a le iuni lakapi, ae i lona lagona ua tatau ona tulai mai se isi suiga fou i lenei tausaga ma le agai i luma. O lona tuua ai o le tofi, ona ua fai si tele o galuega i totonu o lona aiga o loo feagai ma ia, ae o le a aiaiuli mai pea i tua i nisi o polokalame faatino a le iuni.
I le taimi na tulai mai ai le afioga ia Aiolupotea John Roache i lea 25 tausaga, e telē se suiga lelei na ia faia na maitauina ai le agai i luma o le Iuni. Sa ia fesiligia le laulau sa iai i lea vaitaimi, i le uiga moni o le Aukilani Samoa, ae tali o le atinaeina o alo ma fanau o Samoa i le taaloga o le lakapi, auā pau le vaega sa agai iai le Iuni i lea taimi na’o taaloga sa fai i le va o Aukilani Samoa ma Ueligitone Samoa lea sa piki ai tama e taaalo ai.
O le suiga na faia i lalo o le taitaiga a Aiolupotea, o le faavaeina lea o le taamilosaga lakapi i totonu o Aukilani e tausinio ai aulakapi a kalapu ma nuu, ona o le silasila mamao o le afioga ia Aiolupotea i le toatele o tupulaga e lē o mafai ona filifilia i le aufili a Aukilani Samoa. O le atugaluga o le afioga ia Aiolupotea, o le musua lea o tama e toe auai i le Aukilani Samoa pe afai e lē filifilia i le aufili mo taaloga ma Ueligitone Samoa.
Peitai, o le amataina o le taamilosaga lakapi ua maua ai le avanoa e atinae ai taleni tupulaga Samoa o Aukilani. E telē le tāua o lenei taamilosaga, auā o se faitotoa na ulufale atu ai le toatele o tama taalo i le Manu Samoa, ae o Konekalate Lakapi i atunuu i fafo o nei avanoa ua tafe mai ai le manuia mo le atinaeina o aiga.
O isi vaega tāua sa tutupu i totonu o le Aukilani Samoa i le tulai mai o le afioga ia Aiolupotea John Roache, o le maua lea o le mafutaga a tupulaga a nuu ma afioaga i le taamilosaga lakapi o loo faaauauina pea.
O avanoa sa alu ai malaga taamilo e faatolu ona alu malaga i Ausetalia, o avanoa na malaga ai i isi aai o Niu Sila ma taaalo ai ma kalapu Samoa i totonu o ia aai, o malaga taamilo i Samoa lea sa afea ai foi ma Tonga ma maua ai nisi taaloga. E faatolu ona manumalo i le taamilosaga lea sa faia ai le ipu a Michael Jones ma le tele o fanau lea ua manuia o latou aiga ma olaga ina ua maua kalapu i atunuu i fafo e taalo ai.
“E tele lu’itau ma faitioga a’o o’u tulai mai i le tofi, a’o nei luitau o mea lelei uma ia mo le agai i luma o le Iuni lakapi. Ou te lei faavaivai ai foi i nei luitau aua o tapenaga lelei ia a le Iuni lakapi, mo le isi tausaga,” o le saunoaga lea a le afioga ia Aiolupotea.
O loo faaauau pea ona galue Aiolupotea i le tofi Peresitene o le Otahuhu Rugby Football Club ma lona faamoemoe maualuga ia tumau pea le avea o le nofoaga o le kalapu a Otahuhu e faamautu iai polokalame faatino a le Iuni Lakapi a Aukilani a Samoa. Ua mae’a ona tofia le laulau a fono fou a Aukilani Samoa ua tulai mai ai Tupai Siaosi i le tofi Peresitene, Fepuleai Koki Avei i le Sui Peresitene, ma Leota Saufau i le tofi Teutupe, ma le afioga ia Tuifaasisina Moe Mataafa i le tofi Failautusi.
E ui ina ua faamavae le afioga ia Aiolupotea, ae o le a manatua pea lana tautua lelei ma ona faiva alofilima sa tapue, atina’e ma faafoe ai le Aukilani Samoa i le 25 tausaga o lana tautua lē faatua’oia, e le gata o ia o se Sui o le Iuni Lakapi, ae o le 23 tausaga na ia tulai ai i le foe i le tofi Peresitene.
