O le manumalo mataina a Joseph Parker ia Jason Bergman i Samoa na faasalalauina tuusa‘o i le lalolagi atoa ma faalauiloa ai si o tatou atunuu i lona matagofie ma le lanulauava o laufanua, matagofie o mataaga, laumata fiafia, faaaloalo ma le tausaaffia aemaise lona tagavai, Faavae i le Atua Samoa.
E tele foi tapenaga a le malo, ofisa o turisi ma nai afioaga aemaise nai aiga o le alo iloga ia Joseph Parker mo le faataunuuina lelei o lenei aso na silasila uma atu ai le lalolagi ia Samoa.
O se taimi muamua foi lenei ua faataunuuina atu ai se fusuaga o le fusi paga mamafa o umia e Parker i Samoa i talafaasolopito o fusuaga.
Ae peitai o lea po e ui ina taofia le taaloga i le taamilosaga valu ma manumalo le lupe faalele a le atunuu mo le sefuluvalu o ana fusuaga e aunoa ma se faia‘ina, ae na vaaia ai i luga o le televise se uiga matuia ma tufanua e masalo nisi e lē masani ai Samoa i taligamalo faapenei.
O le vaai lea i luga o faasalalauga tuusao ni tupulaga talavou na maimoa i le fusuaga faatasi ai ma le mamalu o le atunuu o faatino i o latou tamatamailima faailoga tufanua ma le lē migao agai i meapueata ma TV sa pueina tuusa‘o mai lenei taaloga mo le maimoa a le lalolagi atoa mai Samoa.
Sa vaaia le faasuaava o nei tama ma teine talavou ma e lē o iloa igoa, faaiu, nuu ma afioaga e afifio mai ai. I luga o le Foxtel i Ausetalia nei na maimoa i ai le silia ma le 100 miliona o tagata e fiafia i fusuaga ma faateia ai i uiga nei o le fusuaga na faia i Samoa.
O se vaaiga tufanua i manatu o nisi o tamalii i Sini aemaise foi le mamalu o Ekalesia o loo tauaveina tu ma agaifanua faatupu a Samoa faatasi ma le talalelei auā Samoa o soifua i atunuu mamao.
O se mataupu foi lenei o loo galulue malosi ai Fono a Samoa i Sini ma isi setete, o le tineia ma fafagu fanau talavou ia tausisi i le talalelei ma le faasamoa e lima taitaina ai o latou olaga ma le ta‘uleleia i le lumanai.
I le tele o isi fusuaga faavaomalo i le tele o tausaga sa maimoaina e aunoa ma se vaaiga faapenei ae ua tasi lava lenei avanoa e avatu ai le faamoemoe o lenei alo iloga o se sui tauva i le lumanai mo le fusi tele o le lalolagi ae o lenei ua faaali ai aga ma uiga lē taupulea o le tupulaga.
O loo fesili nei le mafaufau o Samoa ua toatamai nei i luga o upega tafailagi i nei uiga pe aisea? Poo le tuufau o fanau, ua talia gofie e tupulaga Samoa le faiga faaneionapo i luga o tifaga poo le lē mafaufau lava ma le lē fautuaina.
