O le faaiuga o le vaiaso na tea nei sa faamaonia ai e le Faamasinoga Maualuga moliaga o le faia o ni sauāga matagā faasaga i se alii Leoleo Sinia o le Matagaluega o Leoleo ma Falepuipui.
E lima lelei moliaga faapea o le faia o sauāga matagā faasaga i se alii talavou ua faamaonia faasaga ia Tafili Fineaso Aimaasu, o se alii Taitai Leoleo le Matagaluega.
E tasi se isi moliaga o le faia o uiga faa-Sotoma ua faaleaogaina e le Faamasinoga.
O le faaiuga lenei o se iloiloga na faatautaia mo le vaiaso atoa i le Fale Faamasino i Mulinuu ma na matuā teena e le alii Leoleo nei moliaga. O le Afioga Alo Vaemoa Vaai na fofogaina lenei mataupu i luma o le Faamasinoga.
O le mataupu lenei na lāgā ina ua faalauiloa e le alii e suafa ia Viliamu le faia e lenei alii leoleo o faiga matagā faasaga ia te ia a o taofia ai Viliamu i le Olomanu, o se nofoaga ua faatuina e le Malo i Mulifanua mo le tupulaga talavou e manatu le Faamasinoga e lē tatau ona ave i Tafaigata ona o a latou solitulafono, ae ia tuu i se nofoaga e toe fotuai ai lo latou ola ma tau faatonutonu ai e taofi ai le solitulafono.
O le susuga ia Fineaso na tofia e faauluulu i ai lenei nofoaga ina ua tatala e le Malo.
O lona vaaiga la o pagota laiti nei na tulai mai ai loa faafitauli e pei ona iai sauāga ua ta‘ua e le alii o Viliamu.
O Viliamu o le faafafine ma na magalo ese mai i lea nofoaga ma toe maua foi i se isi solitulafono o le gaoi ae ua matua ma ua mafai loa ona tuli lona faasalaga faafalepuipui i Tafaigata.
E oo atu lea alii i le toese i Tafaigata ua iai foi Aimaasu i lea nofoaga o ia o se tasi o taitai leoleo. Ta‘ua foi e lea alii na oo mai lava i le Ofisa o Leoleo e faaulu ai lana tagi ina ua alu ese ma Olomanu peitai o le fiu e faatali se tali mai a le Matagaluega na mafua ai le oo loa i tusitala ma faalauiloa ai loa le mataupu.
Na fesoasoani le Faalapotopotoga o le Toomaga mo Ē Puapuagatia i le faalauiloaina o lenei mataupu ma le ave ai o se isi tagi lona lua lea la ua mae‘a i le faamaonia o moliaga faasaga i le taitai leoleo.
E toalua foi nisi leoleo o loo talia le iloiloga o ni tagi faasaga ia i laua ae o moliaga o le gaoi ua faia faasaga i nei alii a o tiute ai i le Maota o le Ao o le Malo.
Mo Aimaasu, na tulai mai loa nei moliaga faamalolo loa e le Matagaluega o Leoleo ma Falepuipui ae faaauau suesuega ma talia ai se iuga a le Faamasinoga.
