O le suesuega o le mafuaaga lilo o le maliu o se matai talavou o Faleatiu na faatautaia e le faamasinoga i le vaiaso ua mavae, ua aumai lana faaiuga ua faamaonia o le pulufana mai se laau malosi na tauaveina e leoleo na mafua ona aafia pe lavea Rapi Sialei Lelevaga o Faleatiu.
O le taunuuga o lenei suesuega ua tali ai le fesili sa nofo pogisa ai le aiga o lē na maliu pe na faapefea ona aafia lo latou tagata i le pulufana.
E pei ona silafia e le aufaitau o le galuega a leoleo na agai i Faleatiu mo le sueina o le fanua ma fale o se aiga sa masalomia i le totōina o laau faasāina o le maruana, na mafua ai ona tulai mai le faalavelave lenei i le tausaga e 2012 ina ua tali atu leoleo i le faaaogā o laau malosi sa latou tauaveina mo le puipuia o lo latou saogalemu, ina ua osofai ane i latou i se laau malosi. E oo mai i le taimi nei e lē o iloa poo ai na faia lea gaioiga, ae pe o se tagata o le nuu na agai i ai le galuega na faia lea gaioiga.
O le aso fitu o le masina o Me o le tausaga 2012 na alu ai le osofaiga lea a leoleo i Faleatiu i le vaveao. Peitai e lei taunuu le galuega i le nofoaga sa faamoemoe i ai, ae tulai mai loa le faaletonu ina ua tali atu leoleo i ni uafana ma faapea ona manunu‘a ai ni leoleo se toatolu i ni pulufana na osofai ane ai i latou.
E oo mai lava i le taimi nei e lei molia se isi o Faleatiu i le gaioiga na tupu. O le suesueina o le mafuaaga lilo o le maliu poo le inquest na tulai ai molimau se to‘a luasefuluono e aofia ai ma se molimau o se lipoti i le taunuuga o suesuega a nisi o alii leoleo faapitoa mai Niu Sila poo forensic experts.
O lea suesuega na maua ai ni pūpū i le fale o le aiga o lē ua maliu, ae 39 atigi pulu na maua ai foi ma o ni ututau na gaosia i Ausetalia.
Na molimau foi se fomai mai Niu Sila e faia taotoga e sailia ai mafuaaga o se maliu lea na faaalia e lea molimau o le pulufana na aafia ai le ao poo le ulu o lē na aafia, sa faapea ona alu atu lona malosi ma aafia ai le itu agavale o lona tau‘au.
O le taunuuga o lenei suesuega ua faatalia ai se poloaiga a le faamasinoga poo orders, a o lea ua maua tonu le mafuaaga o le maliu o le matai Faleatiu.
