Faamaonia le fasioti tagata paivalea i lona toalua

Ua taunuu le iloiloga a se laulau o faatonu na suesueina molimau o le moliaga o le fasioti tagata faamoemoeina faasaga i le alii o Faranisisi Satalo Talataina, e soloia le moliaga o le fasioti tagata faamoemoeina, ae sui i le faamaonia o le moliaga o le fasioti tagata paivalea.
Na mafua ona aafia lea taulealea i se solitulafono ina ua toatamai i ni tala faaulaula ma tala taufaifai a lona toalua ia te ia, ina ua fu‘e lana suavai ‘ulu e mata e le vela.
O le aso 12 o Setema 2008 na tulai mai ai le solitulafono ina ua avea ia tala taufaifai ma pogai o le fasi e Faranisisi o lona toalua.
O le fasiga o le fafine na faamatalaina e leoleo na amata mai tua o le faasee o le fale o le aiga o le fafine sa nonofo ai ma Faranisisi, ae taualuga i le fale tele i luma.
I tolaulauga a leoleo na taua ai na palasi le fafine i lalo ina ua sulu ma avanoa ai loa Faranisisi ona ia toe fasi lona toalua i ona lima lea e faapea na ia uu ai le ulu o le fafine ae tu‘i i le fola sima o le fale tele.
Sa tetee Faranisisi i le moliaga o le fasioti tagata faamoemoeina e pei ona ia molimau sa la taaalo ma lona toalua ae o lona ita i tala a lona toalua i le mata o lana umu ulu na mafua ai ona ia fasi. I molimau a le itu a leoleo na faaalia ai, le matuia o manua i le ulu o le fafine na aafia ai lona faiai ina ua sao i ai le toto. O le molimau lea a le alii fomai na faia le taotoga faapitoa e sailia ai mafuaaga o maliu poo le pathologist.
Sa solouli mata o le fafine atoa ai ma se ta‘e i le itu taumatau o lona ulu e lata i lona mata taumatau. O le lipoti a le fomai e sailia mafuaaga o maliu na feteenai ma le lipoti a le fomai na vaaia le fafine a o taofia i le numera fitu o le falemai o Tupua Tamasese Meaole mo togafitiga.
O le mau a lea fomai na mafua le maliu ona o se fasi fa‘i na poloka ai le alaea poo le faai o le tina. Ae sa molimau le uso o le fafine na tausimai e lei tausamiina lava e lona uso se fa‘i mai meaai a le falemai talu ona taofia seia oo ina maliu i le aso 17 o Setema 2008.
O le lipoti a lea alii fomai na ia toe tautino ai i le faamasinoga lona lagolagoina o le taunuuga o suesuega na faia e le fomai e faia taotoga e sailia ai le mafuaaga o le maliu o le fafine.
O le aso 8 o le masina fou o Fepuari 2010 o le a aumai ai se faaiuga a le Faamasinoga Maualuga faasaga i le alii o Faranisisi Satalo Talataina.