Masalo i le lua vaiaso na se‘i mavae atu nei o Niu Sila le atunuu ua faamanuiaina tele i le anoanoai o taaloga o lea sa tatala ma amataina ai i lenei taumafanafana.
I le faaiuga o le lua vaiaso talu ai, sa amataina ai le Super 15. O le vaiaso talu ai foi na faapea ona amatalia ai le taamilosaga Kilikiti i le Ipu o le Lalolagi ma le anoanoai o isi taaloga.
I le taamilosaga Kilikiti o le Ipu o le lalolagi lea o loo foliga mai o loo talimalo ai Niu Sila ma Ausetalia e pei na amatamata mālie a o lea ua agaigai atu ina faatetele ifo le tulaga amanaiaina e tagata lautele aemaise o lea o loo talimalo ai Niu Sila ma Ausetalia.
Ua pei ua avea foi le manumalo o Niu Sila i lana uluai taaloga ma mea ua faatupu fiafia ai i tagata ma amanaia ai le Ipu o le Lalolagi i le taaloga o le Kilikiti i lenei taimi faatasi ai ma isi taaloga o loo faagasolo ai.
Nisi nei o iuga o taaloga mai le faaiuga o le vaiaso
Manumalo Niu Sila ia Egelani
Manumalo West Indies ia Pakistan
E lei maua le iuga taaloga Ausetalia ma Bangladesh
Manumalo Sri lanka ia Afganistan
O le aso foi lea o loo faagasolo ai isi taaloga e pei o le taaloga i le va o Egelani ma Sikotilani e faia i Kalaiesetete. O le asō foi e taaalo ai West Indies ma Zimbabwe, Aso Lulu e taaalo ai Ireland ma UAE i Brisbane i Ausetalia. O le Aso Tofi e taaalo ai Afghanistan ma Sikotilani, ae taaalo Sri Lanka ma Bnagladesh.
O le Aso Faraile e taaalo ai South Africa ma West Indies, Aso Toonai loa o Niu Sila ma Ausetalia e faia lea taaloga i Eden Park. Ma o loo faagasolo ia taaloga i le taimi nei, masalo e faamae‘aina nei taaloga i le faaiuga o Mati poo Aperila.
