O le alaga a le faisalamo a Tavita, “Lou agaga e, ia faamanū atu ia Ieova, o mea uma foi oi totonu ia te au ia faamanū atu i lona suafa Paia, aua foi nei galo se mea e tasi o ana meaalofa.” O le lagona o le faafetai na saunoa i ai le susuga i le faafeagaiga ia Fereti Purcell mai le ekalesia faapotopotoga a le Atua (AOG) i Brisbane i Ausetalia, o ia sa fai ma taitai o le sauniga o le faamanatuina o le 90 tausaga o le tina matua ia Faamele Luamanu, e pei ona faia ai lenei faatasiga ma le taumafata tele i le fale‘aiga o le Manhattan i le Aso Toonai ua mavae.
O le susuga ia Fereti o se alo lava e faasino i le tina ia Faamele. Sa matagi ma loulouā lea aso, ae sa faatumulia lava le maota i uo matutua a le tina faapea ona auaiga sa auai faatasi e molimau le faamaoni o le alofa o le Atua i lona soifua. E tele ni molimau lelei a nisi i lona soifua aemaise lava o lana ekalesia. E toaiva alo o le tina ma na latou saunia foi se pese e momoli ai o latou alofaaga faatasi ai ma latou faafiafiaga.
Na faatasi ai foi nisi o susuga i faafeagaiga mai isi ekalesia faapea lana fanau o loo aumau i Ausetalia ma Samoa. O le faletua ia Kopi sa fai ma fofoga o le aso o loo aumau nei i Melepone, na ia momoli foi le faafetai i le mamalu o Samoa potopoto sa auai auā le molimauina o le atoaga o le 90 tausaga o le soifua o si o latou tina.
O o latou alofaaga ma faamanuiaga e momoli mo le latou tina peleina: mai ia Rev Fereti ma Viola, Viliamu Nofo ma Ngametua, Kopi ma Allen, Elisapeta ma Seiuli, Maika ma Etu, Rev Levale ma Soama, Soreta ma Tino, Lise ma Manuele, o si ona tuagane ia Leatigaga Tai faapea ma fanau o lana fanau, aemaise o ona aiga uma i Samoa, Ausetalia ma Niu Sila. Faamanuia tele le Atua i lou aso soifua Faamele!
