Na matuā faatumulia le Hall a le Ekalesia a Iesu Keriso o le Au Paia o Aso e Gata Ai i Eight Miles Plains i uo ma aiga o le tamaitai ia Sosane Pailegutu Afoa i le faamanatuina o lona 21 tausaga.
Na maeu le maofa o le toatele sa auai i lea aso ona o le tausiga faaletina sa fai toatasi e le tina ia Sala Pailegutu Afoa i si ana fanau e toafā, lea e ulumatua ai le tamaitai ia Sosane na faamanatuina lona 21 tausaga i le Aso Toanai 30 0 Aperila.
O le susuga ia Brother Weshe sa taitaiina le sauniga o le aso fanau, ae o lona uncle ia Sofara Feliuai sa fai ma MC o le aso. Na matagofie faafiafi’aga na saunia lava e ana uo ae lē gata i lea o le sioa o le au valaaulia i le matagofie o musika faaonapo nei sa faafiafia ai le DJ lauiloa i Logan City a le alii talavou o Sef Faagase ua faaigoaina o le (DJ FAZE).
Sa molimau e le tina ia Sala (mai le alalafaga o Puapua i Savaii) ma le maligi o ona loimata le soifuaga o si ana tama, lea na ia ta‘ua o se tamaitai loto fesoasoani ia te ia i meafai a le aiga.
Na ia faapea atu ai “Sosane ou te lē manao i se tupe mai ia oe, pau le mea ou te manao ai, ia faatumauina lou usiusitai ma teine lelei, aemaise ai, ia saili sou soa lelei e alofa faamaoni ia te oe”.
Na tali atu Sosane i le manoaga o si ona tina ma le maligi o ona loimata ma faapea atu “Mum ou te alofa faamaoni ia oe, Mum e lei taitai na uma ona totogi la‘u aitalafu ia oe, i lau tausiga faaletina ua ala ai ona ou maua nei aso e tele.”
O le afioga ia Afoa Pailegutu Afoa mai Niu Sila sa fai ma sui o aiga galua e faafetaia le auvalaaulia. O le Tofa ia Taupa‘ū Tusitala Uta‘i sa fai ma sui o le auvalaaulia e faafetaia aiga galua e tusa o le tele o faaaloaloga.
O Sosane o lona tina o Sala Pailegutu Afoa (Puapua Savaii) ma si ona tamā ia Taotafa Matafeo. Sa faamanatuina le aso soifua i le Ekalesia a le Au Paia o Aso e gata ai i Eight Miles Plains Underwood.
