Faamanuiaga 21 tausaga o le aso fanau o Joseph Mapusaga Nanai

O le po o le Aso Toonai na se‘i mavae atu nei sa faatasitasi ai aiga ma uo mamae a le susuga ia Joseph Mapusaga Nanai i le hall a le RSA i Onehunga, o iina sa faapea ona sii a‘e ai le viiga i le Atua, e sula ai Lona agalelei ona ua aulia mai ma le manuia e le atalii le 21 tausaga o lona soifua.
O se faatasiga na matuā iloga ona faatumulia, auā sa lagolago uma e aiga ma ana uo mamae. O le afioga ia Patele Felise sa saunoa i le sauniga lotu, ona faagasolo ai lea o polokalame uma e pei ona sa molimauina i lea afiafi. Na lei alotamala aiga i le faafiafiaina o le tama fai asofanau, auā sa a‘o lelei a latou siva sa faatinoina i le faamoemoe.
O le tuaa o le susuga ia Joseph sa saunoa i upu apoapoai faatamā i le atalii, ma foai ai loa ma le ki. Sa vaaia le agaga fiafia o aiga sa sapasapaia le aso faapitoa o le susuga Joseph, aemaise foi o nisi o ona uso sa malaga mamao mai lava i Ausetalia ona o le fia molimauina o lona aso fanau.
O le afioga Faasavalu o se tasi o uso o le alii o Joseph sa malaga mai ma si ona afafine ina ia auai faatasi ma aiga auā le momoli a‘e o le viiga ma le agaga faamanū i le Atua, ina ua mafai ona ia foai nei tausaga e tele i le susuga Joseph e pei ona sa faailogaina lona 21 tausaga.