E faamanatuina e isi atunuu pe a atoa le 21 ma faaigoa o le saolotoga e tatala ai le tama poo le teine e fai le saolotoga, ae o le faamausaliina lea o le mafutaga mafana a le tamaitai ma le alii Samoa ma ona mātua.
E toe amata ai se isi faavae o le galue auauna e totogi pea le aitalafu i mātua, o se aso e faailoa ai e mātua i se tasi o le fanau ua aulia nei tausaga e leai lava se isi mea e maua ai le fiafia e pei o le aiga moni.
Na faatasi uma ai aiga, uo ma ē masani a o le tamaitai talavou o Havila Faalele Lepua i le Aso Toonai ua tuanai aso 7 o Me i le Hall a le Ekalesia a Iesu Keriso o le Au Paia o Aso e Gata Ai i Karawatha, i le faamanatuina o le 21 tausaga o lona soifua.
O le susuga i le alii Epikopo ia Otineru Tofa mai Marsden Ward na taitaiina le sauniga, lea na faamamafaina ai se fautuaga i tupulaga talavou uma faapitoa mo Havila e alo ese ma faatafa i le malosi o faaosoosoga a le fili ua tele ina afaina ai le tele o olaga o le tupulaga talavou, o le fofo la o ia faafitauli, o le mafuta i le Atua, tatalo ma anapogi.
O si ona tuagane ia Alofa Lepua, ma lona aunty o Faalele Tafa na fai ma fofoga o le aso, o lona tina, le faletua ia Vaipapa (Tufuiopa i Apia), o se alo e faasino ia Rev Alapati Tuuga Stevenson (Safune) ma le faletua ia Sarai Taliulu, o le aiga lenei e tupuga mai ai le Faili lauiloa o le Five Stars.
O le tamā o Havila, o le fetalaiga ia Niuapu Siaosi Lepua (Leulumoega & Satupaitea).
Na matuā sioa le auvalaaulia i faafiafiaga matagofie na siva ai le tamaitai ia Sarina Alofa Tuuga Stevenson, faapea le tamaitai ia Lole Talatau Lepua, atoa ai ma faafiafiaga a aiga-na-lua.
Na pei lava ua toe soifua mai le susuga ia Alofa Tuuga Stevenson ua lauiloa i le Five Stars i le logomalie o pesega na toe lagiina i lea po.
Na saunoa le tama ia Niuapu i le foaiina o le ki i si ona afafine o Havila, ua na o se ki o le 21, ae o le taitaiga o lou olaga, e manuia ma iu manuia e ala i le faatonuga a mātua.
O le tofa ia Leau Porotesano Utai na faafetaia aiga-na-lua e tusa o faafiafiaga ma taumafataga felanulanuai mo le auvalaaulia.
Manuia le atoaga o lou 21 Havila mai ou aiga ma uo i Samoa, Niu Sila, Amerika ma Ausetalia!
