E sefulu ma le valu masina na malaga ai le tamaitai o Shanez Fiu Talosaga o Melepone mo le finagalo o le Atua i le aai o Perth, lea na faamae‘aina ma toe taliu mai i le faatali atu a nai ona mātua pele ma tauaiga uma i le Aso Faraile na tea nei, ma faafoi faatasi ai le viiga i le Atua, ma faagasolo ai loa ma le faamanatuina o lona aso soifua ua atoa i ai lona luasefulu ma le tasi tausaga.
O ia o le alo o le susuga i le Epikopo Fiu Talosaga Iosua ma le faletua ia Leatuao mai afioaga o Sili ma Saleapaga. Na taitaia le sauniga e le sui epikopo le susuga ia Paepae Leausa, ma fofogaina ai le finagalo faalaeiau mai le afioga paia a le Atua, ona alo ai lea mo le fiafia o le 21 o Shanez.
O le fofoga o le afiafi o le susuga ia Fiu Tii Matagi, na saunoa e fai ma sui o aiga na lua e faafeiloai ma faafetaia le galuega fitaituga a le vasega i le au Epikopo ma o latou faletua, tainane Samoa uma na tauaofia ma le mamalu i le valaaulia, ona tali loa lea o le sua ma alo i le taumafataga felanulanuai ma le matagofie.
Na tali le sua ma silamaimoa i faafiafiaga na tuufatasia e nisi o uo ma tauaiga, ma faafofoga foi i molimau o le soifua tautua o le afafine, ona foai lea o le ki e faamau faailogaina ai lona 21, ma lufilufi ai le keke matagofie.
Sa faaauau faafiafiaga a le autalavou faatasi ma saasaaga faa-Samoa i pesepesega ma le musika mālie a le DJ JonnyBGood. Sa maualuga ma matagofie atili le faamoemoe o Shanez ona o faaaloaloga na maau i ai si ona aiga mo le Aufaigaluega Paia ma le mamalu o Samoa.
Ia manuia lou aso fanau Shanez! Malo le tauivi mo mea lelei, faaopoopo e le Atua nisi tausaga se tele mo oe. Alofaaga mai ou mātua pele ma ou tauaiga uma.
