Faamanatu le 96 o tausaga o le EFKS Magiagi

O le loto ua tumu i le faafetai ma le faagaeetia na faaalia e taitai o le aulotu a le Ekalesia Faapotopotoga Kerisiano Samoa i le afioaga o Magiagi ina ua faamanatu le atoaga o le 96 o tausaga talu ona faavae aloaia lenei ekalesia i totonu o le afioaga.
O se sauniga lotu e pei ona faatautaia i tausaga taitasi ua faafetaia ai le agalelei o le Atua i lana tausiga i le afioaga aemaise sui o lea aulotu ma taitai mai ai lo latou soifua i le faaopoopoga o lea tausaga ma lea tausaga.
O le uluai ekalesia lea na faavae i totonu o le nuu, ma o le tausaga e 1917 na amata mai ai faamaumauga na tolaulau i le mamalu o le ekalesia na auai i lona aso faamanatu i le Aso Sa.
O le susuga i le faafeagaiga ia Tuanai Uesile o loo tau asuina le vai o le ola i totonu o le ekalesia e pei ona sui tulaga mai ai i lē sa umi foi se taimi o galue ma taitaia lea ekalesia, le Susuga i le Faifeau Toeaina na tulai mai o le Taitaifono o le EFKS, le susuga Atapana Moreli Alama.
O le sauniga faapitoa lenei sa mafai ona taitaia e se tasi o alo e faasino i le afioaga o loo tausia le EFKS i Weymouth i Aukilani i Saute le susuga i le faifeau Rev. Silo‘a Lologa.
Sa auai mai i toe sauniga o se tasi o tina o lona aiga, o se tasi foi o tiakono o le EFKS i Magiagi le tina ia Sua Papalii. Na sosoo ai ma le molimauina o se isi foi toe sauniga o se tasi o tiakono matua o le ekalesia lava lea e tasi, le Susuga Tui Pi‘o e maliu ua 84 tausaga o lona soifua.
E sosoo lava toe sauniga nei ma le faamanatu ai o lenei aso tāua e pei ona ave ai le faafetai ma manatua ai tamā ma tina matutua o le ekalesia na taumafai mai nofoaga mo le faamautu ai o ni maota mo lea galuega.
E pei ona folasia i lea sauniga faamanatu, mapuepue muamua lava e tau atu ai pe a agai i totonu o le afioaga i le taimi lenei, o iina sa iai le malumalu muamua lava o le EFKS, a o togavao loaloa le tele o le aai o loo ua iai nei.
O le amataga lava lea i le pito i tai o le afioaga ma e 40 tausaga o iai lea malumalu ae ua amata ta foi fanua o le afioaga ma ua agai i uta, na sii ai loa le malumalu o le EFKS ma tu tonu i le ogatotonu o le aai o loo iai nei.
O le faafeagaiga e suafa ia Rev. Tuamasaga Tapua o Moataa na uluai tausinuu i le afioaga mai le 1929 sosoo ai ma Rev. Fiatala Petaia o Apia na galue mo le 10 tausaga na sosoo ane ai, ma o iina na amata ai ona fau le maota o le galuega, e ala i le fesoasoani a tagata mai Niu Sila i lea vaitaimi.
Mai i le tausaga e 1924 na mae‘a ai le malumalu muamua faatoa tala i lalo ae agai loa i le ogatotonu o le aai ona ua uluola le nuu.
O le tausaga e 1970 na faatoa toe fausia ai loa le malumalu lona lua o le ekalesia ma umusa ai i le tausaga na sosoo ai.
O le taimi lea ua iai le isi faafeagaiga o le susuga ia Rev. Solofa Taaina Vafulu na galue mai i le 1942 sei’a oo i le 1974. O le susuga la ia Rev. Atapana Moreli Alama lea na sui tulaga i le susuga Rev. Solofa ina ua tuumalo, ma o le tausaga e 2008 na faatoa toe suia ai le faafeagaiga ina ua maliu Rev. Alama.
O le tausaga e 1990 na fa’aleagaina ai le malumalu o le EFKS i Magiagi i le afa o Ofa ma e fa lelei tausaga mulimuli ane o faagasolo galuega toe faalelei ma faafou atoa ai le tino o le malumalu lea e pei ona iai e oo mai i le taimi lenei.
Ua faaigoaina o Peteli le malumalu o iai nei ma sa tele ina faaaogā e le Pulega a Apia i Sisifo ina ua tulai mai le susuga Alama o le Toeaina o le Pulega faapea ai lona tofiga mulimuli ane o le Taitaifono o le EFKS.
O le susuga ia Rev. Tuanai Uesile lea ua tauaveina le galuega o le tausinuu i lea aulotu.
I tausaga ua mavae na faatautaia ai lea lotu faamanatu i le masina o Tesema i le aso 21 peitai talu mai le tausaga na tea nei, na amata ai loa ona faamanatuina i le aso 16 o le masina o Iuni ma le faamoemoe o le taimi lelei lava lenei e faatino ai lea faamoemoe i le sami ai o lenei tausaga faaopoopo, ua iai se isi galuega toe faalelei ua talanoaina nei e ona matafale e silia i le 50.