Na matuai faatumulia ai le Tavernetta Function centre i le itu i Matu o Brisbane, i le po o le Aso Sa, 27 o Novema, ua lē gata i aiga ma uo, a o le paia foi ma le mamalu o le Ekalesia Aso Fitu o le Toe Afio Mai, ona o le faamanatuina o le 21 tausaga o le afioga ia Tagiane.
O nai ona mātua o le susuga i le faafeagaiga ia Pr Tusitina mai Taga i Savaii ma le faletua ia Lata Faiumu Safa‘i Safai.
O se tamaitai e molimauina le faamoemoeina i totonu o le aiga i soo se vaega. O se tamaitai e usitai ma faalogo, e fiafia foi e talanoa ma mafuta i aiga ma soo se tagata.
O loo aotauina nei o ia i le University of Queensland o loo a‘oa‘oina lana mataupu tau Accounting.
Na taitaia le sauniga lotu e le susuga i le faafeagaiga ia Pr Ieti Ah Shu, ae tatalo faamanuia le susuga ia Pr Aitui Fanene (Aso Fitu o le toe Afio mai).
Na masii uma mai aiga mai Sini, Melepone, Adelaide, Griffith, uncle Taula Faaeteete ma Aunty Faasee mai Samoa faapea le loaloa o le aiga i Brisbane nei. Sa auai foi le susuga i le faafeagaiga ia Pr Sam Afamasaga ma le faletua ia Emma.
Na saunoa si ona tuaa ia Pr Tusitina e momoi lona agaga faafetai i le olaga tuputupu o si ona afafafine pele e toatasi, na te faamalieina loto o i laua mātua.
O le fatu na totōina mai e tuaa ua failagi folauga Faiumu Ioane ma Siliva, soo se faamoemoe lava e fai, e faapotopoto uma lava aiga poo le ā le mamao ma valavala e aofaga faatasi e iloa ai le fealofani, e pei ona molimauina i lea afiafi.
O le fofoga o le aso ole tofa ia Tamala Moni Faiumu na malaga mai Adelaide. O le faaili mālie a le One Sound sa faafiafia i lea afiafi, le susuga ia Eric Pepe ma le vaega.
O alofaaga mo oe Debbie mai ou aiga uma lava i Samoa, Sini, Melepone, Adelaide, Griffith ma aiga uma i Niu Sila ma Brisbane, ae silisili ai alofaaga mai ou mātua pele, Pr Tusitina ma le faletua ia Lata Faiumu Ioane, faapea ou tuagane ma Susuga i Faafeagaiga ma faletua uma ma le Ekalesia Aso Fitu o le Toe Afio mai i Kuiniselani.
Alofaaga foi e auina atu i le leitio a le Penina o Asuisui ma le aufaigaluega.
