O le viiga ma le faamanū i le Atua auā o lana pule faasoifua ua aulia mai ai e oe le Tamā matua, Rev Samuelu Tu‘iai le atoaga o lou 89 tausaga i lenei masina. O le gasū o le taeao sa e asaina ua faamalo le saili malo i le Atua ma lona finagalo.
E talitonu le Tamā matua i le finagalo o le nofoaalo e faamanatu lona aso soifua peitai na tonu i lona manatu o le siitia o le taulaga faafetai i le Atua ma sina taumafataga māmā, ua sili atu lea.
E fiafia le Tamā penisione manumalo malolo ia Rev Samuelu e alaga a‘e i le Atua ona ua aulia nei lona 89 tausaga ae o loo maua pea le la mafutaga mafanafana ma si ona faletua, le Tina manumalo malolo ia Tima Tu‘iai, aemaise le nofoaalo o loo i totonu o le galuega, le faletua ia Senerita ma le susuga i le Toeaina ia Rev Tauaaga Mataafa lea o loo tausia le Ekalesia a Southwest Brisbane ma le Pulega a Saute.
Faafetai mo au galuega lelei uma e lē gata i le Aiga ae faapea foi i le Ekalesia. O alofaaga e lē mafai ona mavae mai le nofoaalo o ta‘ape i soo se tafa o le lalolagi ona o galuega ua totofi ai e le Atua aemaise o latou aiga ma fanau ae faasilisili ai alofaaga mai le susuga i le toeaina ia Rev Tauaaga ma le faletua ia Senerita Mataafa ma le nofoaalo o loo tou mafuta pea.
O alofaaga foi auina atu ia Taimane Agnes ma si ona aiga, ae miliona mai si au manamea le faletua ia Tima Tu‘iai faapea nisi o le nofoaalo ma o latou aiga.
