Faamanatu 80 tausaga soifua o le tina ia Mele Lisi Aumua

O se aso matagofie e lē gata o se faatasiga o le Eseta, ae faasili ai le agaga faafetai i le Atua ua mafai ona aulia ma le manuia e se tasi o toe ulutaia o le atunuu, le tina matua ia Mele Lisi Aumua, le 80 tausaga faitaulia o lona soifua.
O le afiafi o le Aso Toonai, 30 o Mati, lea na potopoto ai alo ma fanau o le tina matua e faamanatuina nei tausaga fiafia e 80 mo si o latou tuaa.
Sa soifua a‘e Mele Lisi Aumua i si ona alalafaga o Satapuala. O ona tuaa o Teo Siapia o Vaiee Safata, ma Vanila Tagatanuu o Satapuala ma Vaigaga. Sa papatiso o ia i le tausaga e 1959.
E 16 le nofoaalo a Mele Lisi Aumua. E to‘a 11 tamaitai ma alii e to‘a 4 ae ua maliu le toatasi. O fanau a lana fanau e to‘a 51; o fanau a fanau a lana fanau e to‘a 55, lona uiga o i latou na tupuga mai ia Mele Lisi Aumua, e to‘a 122.
Sa taitaia le sauniga e le susuga ia Alatini Aumua, o le alo lava o le tina matua, o le Fesoasoani 2 o le Ekalesia a Iesu Keriso o le Au Paia o Aso e Gata Ai, i le Uarota a Camira. O Mele Lisi Aumua o loo avea ma tagatalotu i le Uarota a Goodna. O le susuga ia Sa‘u Matano sa fai ma fofoga o le aso.
Manuia tele le atoaga o lou 80 tausaga Mele Lisi Aumua, alofaaga mai lau fanau pele, aiga ma uo, faapea lau Uarota i Goodna.