O le tausaafia ma le fiafia i tagata Samoa o se tasi o alii palagi ia Terry Kabeck e maupaolo i se tamaitai Samoa ia Ivy Leauanae Kabeck na faatumulia ai le faamanatuina o lona aso soifua i lo laua maota i Lidcombe i Sini. O le faletua ia Ivy Leauanae Kabeck e mai Faatoia i le Vaimauga, na avea ma fofoga o le po sa fiafia faatasi ai ma aiga uo ma ē masani.
O le taumafataga o le Aso fanau o se suavai tele (umu) na gaseseina lava i tuāmaota ma o se mataaga lelei mo aiga ma uo palagi faatoa silasila lea ma tofo i le manogi ma le mataina o auala e kuka ai taumafa Samoa moni. O uo ma aiga mai Niu Sila faapea uo ma ē masani mai le la pisinisi taavale o loo tautua ai i Sini ma tagata Samoa le Kabeck Motors.
Na vaaia ma faalogoina foi le malie ma le malu o le musika mai le Karaoke lea e fiafia tele i ai laua nei ma nisi o uo na faatasi i lea po. Sa fuifuilua foi ma le faaili a se tasi o a la uo mafana ma lana faaili o le Poly Sounds le susuga ia Avon Lealiie‘e mai Iva Savaii.
O se tasi lenei o tamalii e sulufai i ai le mamalu o le atunuu i le auaunaga o taavale e fia maua ae faigata na ausia tau, o nisi ua leaga o latou faamaumauga i aitalafu (bad credit). Ua toatele nisi ua maua taavale e usu ai i galuega ma momoli fanau i aoga aemaise le fesoasoani tele i totonu o femalagaa‘iga i aiga.
E lē gata i lea o nisi foi o Ekalesia ma faalapotopotoga ua mafai ai ni pasi laiti e feafioai ai le aulotu mai lenei tautua. Na fai nei auaunaga ma mafuaaga e toe manatu ma faamanuia ai le auvalaaulia i le fesoasoani a lenei ulugalii mo tagata Samoa i Sini.
