O le tau gaga ifo o le la i le Aso Toonai 26 o Oketopa, na faamanatuina ai le 21 tausaga o le alii o Maūnu Sinaumea Taufao, o se alo e faasino i le Peresetene o le ekalesia Uesiliana Metotisi Ausetalia i Inala.
O lea lava faamoemoe sa faapaiaina faatasi ai ma le maota o le faafeagaiga ma le faletua ua mae‘a ona faatauina, le susuga i le Peresetene o le ekalesia Uesiliana Metotisi a Ausetalia Inala i le itu Samoa le susuga ia Rev Risatisone Taufao (Salamumu & Faleasiu) ma le faletua ia Faitauga Taufao (Tiavea & Magiagi).
Sa taitaia le sauniga faamanuia e le susuga ia Rev Evile Pule o le faafeagaiga Uesiliana Metotisi Forest Lake. O le uso lava o le alii fai aso fanau ia Tuifaasisina Lisati Taufao sa fai ma Fofoga o le aso. O le tofa ia Levaopolo Faamaoni sa fai ma sui o aiga na lua auā foi se matū palapala mo le auvalaaulia, ae o le tofa ia Masivao Alofoe Panoa na ia molimolia se agaga faafetai e tusa ma tapenaga matagofie a le faafeagaiga ma le faletua faapea tauaiga.
Sa faatumulia i le ekalesia, aiga uo foi ma ē masani. Manuia lou 21 tausaga Maūnu Sinaumea Taufao! Alofaaga e lē mavae mai ou mātua, uso faapea lau ekalesia ma ou aiga uma i Samoa, Ausetalia, Niu Sila ma Amerika.
