Ua lua tausaga o faaauau pea le fesoasoani a Malo Niu Sila ma Ausetalia i le totogiina o pili o fanau i aoga tulagalua i Samoa ma o se tasi lea o faamāmā avega mo mātua e maualalo ma vaivai le tulaga i le tupe maua.
Peitai o le Malo o Niu Sila i ana fesoasoani mo Samoa i tausaga taitasi o le a maua ai se isi faamāmā avega mo pili o fanau aoga uma i le atunuu i Kolisi ma aoga maualuluga. O le vasega tausaga iva e oo i le tausaga sefulutasi poo le year nine e oo i le year eleven, o le a faamanuiaina. O lona uiga e na o fanau i vasega o le tausaga 12 ma le 13 o le a lē aofia i lea fesoasoani mo pili aoga.
“O lea o loo galulue nei le matagaluega e faamaopoopo vaega uma i le itu i faamaumauga, ma o le tausaga faaletupe e amatalia ia Iulai o le tausaga fou 2013 o loo fuafua e amata ai lenei fesoasoani tāua a le Malo o Niu Sila”.
O le finagalo lea o le Pule sili fou filifilia o le matagaluega o Aoga Taaloga ma Aganuu, le afioga Falanaipupu Tanielu Aiafi, ina ua fesiligia e tusa ai ma lea fesoasoani.
Ua faailoa foi e le alii Pule sili o tapenaga o loo faia e le matagaluega o le a foia ai nisi o faafitauli sa aliali mai i le polokalame o pili aoga mo fanau i aoga tulagalua lea ua lua nei tausaga talu ona amatalia e pei ona fesoasoani i ai le Malo o Niu Sila ma Ausetalia, ma le fesoasoani a le Malo o Samoa.
E lē o iloa pe fia le aofai atoa o le seleni o le a faatino ai lea fesoasoani ae o le meaalofa lenei a Niu Sila na faailoa e le Palemia o Toosavili John Key ina ua malaga i Samoa i le faailogaina o le atoaga o le limasefulu tausaga o le feagaiga faaleuo ma Samoa le Treaty of Friendship e avea ma matu palapala to o Samoa mai ia Niu Sila e faailoga ai le limasefulu tausaga o lona tutoatasi ma le feagaiga faaleuo.
O tapenaga o feagai nei ma le matagaluega o aoga taaloga ma aganuu o loo silasila ai i le aofaiga o fanau i aoga maualuluga ma aoga faapitoa o le a tuusa‘o i ai le fesoasoani aemaise o fanau o loo aoaoina i vasega iva e oo i le sefulutasi i kolisi a ekalesia.
E lē o iloa pe tumau pea ona lē aofia fanau o loo aooga i kolisi tuma‘oti poo private schools e pei ona lē lavea foi i le fesoasoani o pili aoga mo aoga tulagalua, lea e na o aoga a le Malo, aoga mo fanau e iai manaoga faapitoa ma aoga tulagalua a ekalesia o loo agai i ai lea fesoasoani.
