O le tausaga muamua lenei ua mafai ai ona faataunuuina se polokalame ua faaigoaina o le Praise Factor i totonu o le Ekalesia o le Laveai SDA of New Zealand i le itu i Sisifo o Aukilani, o lenei faamoemoe sa tuufaatasia e le susuga i le faafeagaiga ia Tuasivi Nonumalo Crichton ma lona faletua ia Fiapaipai Deborah Puaga Crichton faapea le Ekalesia.
O le aso 12 o Setema na amata ai le tauvaga ma e lua vaega na vaevaeina i ai ona e 17 aufaipese ua saili i ai se fetu pupula o le Praise Factor o lenei tausaga. O le tele o suitauva o tagata taitoatasi ae na o le lua kulupu sa auai ma sa tatala foi le avanoa i tagata lautele e fia tausinio.
O lenei polokalame ua na o pese faaleagaga e taliaina ma e faaulu fua uma aufaipese tauva, ae na o le Aso Toonai lava e faataunuu ai, ma o le aso foi lea e maua ai le iuga o le aufaipese e nofo ma le aupepese e faaauau pea.
O le Aso Toonai muamua 12 o Setema e 9 aufaipese sa tauva, ae o le vaiaso lona lua e 8 aufaipese sa auai, ma e 10 vaiaso sa faagasolo ai lenei faamoemoe.
O faamasino o le tauvaga sa galulue ai le susuga i le faafeagaiga ia Tuasivi Nonumalo, le alii pese o Tala Pauga faapea le tamaitai ia Faavae Simamao, faatasi ai ma le fesoasoani a le alii faasalalau o Sau Siufanua Seuseu, faapea palota a tagata faalogologo sa tuu i le tagata sa lelei ana tapenaga.
O vaega na silasila i ai le au faamasino, poo le togiina o le tauvaga, ia lelei le sound, ia lelei le fesootaiga o tagata faalogologo ma le pese, ia tosina le faafofoga a tagata maimoa i le feau molimoli o le pese ma ia pa‘ia loto o tagata, ma ia lava tapena lelei.
O le Aso Toonai ua mavae 7 o Novema na sailia ai loa le suega siamupini o le tauvaga o le Praise Factor i le malumalu o le Ekalesia o le Laveai SDA of New Zealand i Kelston i aufaipese e tolu na totoe mai i le faagasoloina o le tauvaga. E lua kulupu o le The Boys, ma le The Mamoe faapea le alii pese laitiiti o Osarius Tuua e 12 ona tausaga, ma o le suitauva pito laititi lea o le tauvaga. Ma sa maitauina le faatumulia o le malumalu i lea aso i aiga o suitauva faapea uo ma ē masani sa agai atu e molimauina le aufaipese o le a sola ma le faailoga tupe e $5000.00 ma le Ipu.
Sa faapea foi ona auai atu i ai ma le pule sili o le faletaavale o le Henderson Cars le susuga ia Shiu Singh. Na tatala le polokalame i le sauniga tele e pei ona masani ai lea tovine, ma saunoa loa le faafeagaiga ia Tuasivi Nonumalo i le upu faauuina a le Atua e tomatau ai le aufaafofoga i lea aso.
O le susuga i le taitai toeaina o le Ekalesia ia Taito Olaiaiga Simanu sa saunoa e faafeiloai le mamalu o le atunuu, ae o le faletua ia Fiapaipai Deborah Puaga Crichton sa fai ma fofoga o le aso.
Matagofie pesepesega a nisi o aufaipese taitoatasi sa tova ai le polokalame aemaise o siufofoga mālie a le Auckland Gospel Choir sa fai lo latou sao i lenei faamoemoe lea sa taitai mai e le susuga ia Simon Matāfai faapea i tala faatino na saunia e le autalavou o le Laveai SDA of New Zealand.
E lei faigofie le faiga filifiliga a faamasino e oo foi i le aufaafofoga auā ua lelei uma tapenaga a aufaipese e tolu, ae sa mau pea le toovae ma usi le maimoa a le autapuai poo fea o le ā pa‘ū i ai le uluulu o le laau.
O le iuga na oo i ai lenei polokalame matagofie na auautasi ai faamasino ma tuuina atu le manumalo i le The Boys, ma latou mauaina le $5000.00 ma le Ipu o le faailoga muamua, tulaga lua o le pese toatasi a le alii o Osarius Tuua i le faailoga tupe $2000.00, ma le tulaga tolu o le The Mamoe i le faailoga e $1000.00, ma sa fiafia uma le toatele na molimauina lenei polokalame i le taualuga o le Praise Factor o le 2015.
O le saunoaga faafetai a le tamā matua ia Tagaloa Nanai sa fai ma sui o le auvalaaulia e molimoli le agaga faafetai ma le faamalo i le susuga i le faafeagaiga ia Tuasivi Nonumalo ma le Ekalesia e tusa ai ma le tapenaga o lenei faamoemoe ua manumaloina ai ma faamalosia agaga mo le malo o le Atua.
Auā o le sini autu lea poo le auga o aute o le Praise Factor ia aiāina se loto mo le Alii, ma ia toe maua se fesootaiga ma le Atua aemaise ia i latou ua vavamamao le mafutaga ma Iesu Keriso.
O lenei tauvaga sa mafai ona tuu atu i ai le tau‘au o le susuga ia Shiu ma le faletaavale o le Henderson Cars, o le Sup 2 faapea le Ekalesia o le Laveai SDA of New Zealand.
Ae na saunoa le faafeagaiga ia Tuasivi Nonumalo i lona agaga fiafia, o le toatele o i latou sa auai i lenei 10 vaiaso sa tautino ai ua leva ona lē toe o i ni lotu, ua vavamamao foi ma le Atua ae ua avea lenei polokalame ua toe fafagu ma faamalosia ai le agaga ma toe tata‘i mai ai le ola mo le Alii.
Ma ua maitauina ai foi le toatele o sui na tauva i lenei tausaga ua toe faatoai atu mo le tausaga fou pe a aulia i le alofa o le Atua.
