Ua tapunia aloaia foi galuega faaleaoaoga a le IMABC LOGAN CITY i Brisbane mo lenei foi tausaga 2014, e pei ona iai i le po o le Aso Tofi aso 20 o Novema.
O le susuga i le alii faiaoga ia Ulale Ulale, o le Dean foi lea o le Kolisi i Logan, sa taualuga i ai mataupu o lenei tausaga.
Na mae‘a le suega mulimuli i le po o le Aso Tofi, ona faaiuina lea i le sauniga poo Chapel, auā foi le agaga faafetai ma le viiga i le Atua ona ua faatini foe ma toe sili le upega a le tautai, auā foi faiva sa feagai ma le IMABC i Logan mo lenei tausaga.
O le susuga i le alii aoao ia Iosefa Collins sa taitaia le chapel a o le susuga i le alii faiaoga ia Ulale Ulale sa tomatauina le uluai vasega o lenei aoga e ala i le Upu a le Atua.
Sa taualugaina lea po i se taumafataga tele na aao i ai alii ma tamaitai aoga. O le tofa ia Puipuifatu Tupu sa fai ma fofoga o le Kolisi, e momoli se faafetai i le alii faiaoga, faapea le komiti faafoe a o le susuga ia Talavou Poasa, sa avea ma sui o le Komiti Faafoe e talifuaitau e tusa ma le faamoemoe i lea po.
Ua tuua nei le Kolisi a le Ia Malamalama Agape Bible College i Logan City, ae faamoemoe e toe a‘e mai i le masina o Fepuari 2015.
