O le kamupani lauiloa o laei mo autaaalo o le Barkers New Zealand lea ua aloaia nei le avea ma faleoloa o le a saunia le togiga a le aulakapi a le atunuu le Manu Samoa. O se faaiuga lea na faalauiloa i le fono a tusitala ma le Pulega o le Iuni Lakapi a Samoa i le faaiuga o le vaiaso na tea nei.
O le tau atoa o lenei togiga e le o faalauiloa mai ma ona pau le tali a le Taitai Malaga o le ‘au o Tuala Mathew Vaea, faato‘a mafai ona maua se tau atoa o lea togiga o ofu taaalo a tama pe a mae‘a ona sui ma aumai le ota ua fai.
O le faatupega foi o loo faamoemoe lava le Iuni Lakapi i Samoa i seleni e maua mo le sauniuniga a tama taaalo mo le Ipu o le Lalolagi.
E tele togiga a le Manu Samoa o loo sauni ma o o latou ofutino poo alo‘a faapea ai ie faitaga ua saunia e fale suisui i Samoa lava ia. Ae o ofu faapitoa lava nei mo taaloga ua tapa ai se kamupani faapitoa e saunia ia ituaiga lavalava i Niu Sila.
O le kamupani foi lenei o loo saunia lavalava mo le aulakapi a Niu Sila le All Blacks, o i latou foi e saunia lava togiga a le aulakapi liki a Niu Sila le Warriors ma e le tau fesiligia le lelei o a latou oloa ua faatau atu nei i Samoa.
O le manatu o nisi, pe lei iai nisi kamupani sa tatau ona tuuofo i le saunia o le au a le atunuu, ae o le faamatalaga a Tuala, o le taimi lava atoa ai foi ma le manaoga ia aua nei alu tau autago le Manu Samoa i ana sauniga, e tatau lava ona ave le mea sili mo sauniga o le ‘au a le atunuu.
E $4.5 miliona tala o loo saili e le Iuni Lakapi a Samoa mo le masii atu ai i Niu Sila aua taaloga o le Ipu o le Lalolagi. Ua faaauau i le vaiaso lenei toleniga a nisi o le ‘au na faalauiloa i le vaiaso ua tea e le o malaga i le aumalaga lea ua agai atu i Iapani mo taaloga ma le ‘au a lea atunuu i Tokyo aua le taamilosaga o le Ipu o le Pasefika i le lakapi.
Ona pau lea o le taaloga o le NPC e pei ona faaigoaina ai lea taamilosaga ua talosaga le Iuni Lakapi a Iapani e avatu i lona laumua e faatautaia ai. O se auala ina ia saga unaia ai le lagona fiafia o tagata Iapani talu mai le sunami na matua talepe ai vaega o lea atunuu.
O isi taaloga a Iapani na faatulaga e faia i lea atunuu, ua toe faapolokalame nei mo isi atunuu o le Pasefika o loo tausinio i lea faailoga maualuga i lenei tausaga.
O le mafuaaga foi lea o le ave e Samoa o le faataua i le uluai vaega lenei o sauniuniga a le ‘au a le Manu Samoa mo le Ipu o le Lalolagi ona o le vavalalata o ‘au a atunuu nei e lua ma le amanaia foi e Iapani o le ‘au a Samoa e ala i le valaaulia atu.
Atonu o le fesootaiga i mafatiaga i faalavelave e pei o le sunami ua atili faamalosia ai le lagona o Iapani e avatu le ‘au a le atunuu e taaalo ai i le laumua o Iapani o Tokyo.
O le vaiaso na tea nei lea sa iai i Samoa sui e toalua o le kamupani o le Barkers e fua tino o le ‘au ma i latou o le a malaga faatasi ma le Manu Samoa i le Ipu o le Lalolagi aua le togiga lea ma e talanoa mai i le tusa ma le 50 pe sili atu foi le tele o ofu e fia suiina.
E muamua i Iapani le ‘au a le atunuu sosoo ai ma le agai i Fiti lea o le a agai atu ai ma nisi o le ‘au filifilia lea ua faamuli atu seia oo i le taimi o le taaloga i lea tuaoi o Samoa.
A mae‘a le taamilosaga o le Ipu o le Pasefika ona agai loa lea o le ‘au a Samoa i Ausetalia mo le taaloga tele ma le ‘au a lea atunuu le Wallabies – o le faamoemoe ina ia lava sauniuniga ma le maualuga o le tausinio a le ‘au a le atunuu a o lei oo mai le Taamilosaga o le Ipu o le Lalolagi.
O le mae‘a o taaloga i Ausetalia ona toe taape loa lea o le ‘au a le atunuu aua sauniuniga o konekarate ma kalapu o loo taaalo ai le toatele, o isi e foi mai i Samoa ona toe poto loa lea o le Manu a o loma ai le agai atu i Niu Sila mo le Ipu o le Lalolagi.
