Faalauiloa le uluai lipine pese lotu a le Aiga Fesilafai

O le Afioga Moseniolo Alapati Mataeliga, o le faauluuluga o le ekalesia Katoliko i Samoa na mafua mai ai le igoa o le Aiga Fesilafai e pei ona faaauau pea ona tautua ma faataua e nisi o talavou aemaise foi nai tagata matutua o loo iai i lenei faalapotopotoga i Niu Sila.
O le Aso Toonai na tea nei sa faalauiloa ai le lipine pese muamua poo le CD a le Aiga Fesilafai i Papatoetoe e pei ona taimua ai le afioga Patele Malo Nun Toon.
O le lipine o loo galue ai le afioga Taupau Maselino Mulipola, o le faipese lea atoa ai ma le silia ma le 50 le aofai o le aufaipese o tama ma teine talavou ma le au matutua foi o loo lagolago i ai.
O le polokalame o lea aso na amata i le 10 i le taeao i le Town Hall Papatoetoe, sa faia ai faafiafiaga ma pesepesega a le Aiga Fesilafai mo le faalauiloaina o le latou uluai lipine.
E 11 pese lotu Samoa o loo iai i lea CD sa pueina e le Vision Recording. Faaalia e Malagamaalii Alefosio Nonumalo o se tasi o sui sinia o le aufaipese, o le taua o lea faamoemoe, ona ua mafai ona unaia ai foi le gagana Samoa aemaise lava mo nai tupulaga na soifua ane i Niu Sila.
E fa masina na tuufaatasia ai lenei lipine pese. O le Aiga Fesilafai o loo iai foi le latou komiti filifilia mo le faafoeina o polokalame faapenei, o loo faaaoga ai foi le taleni a alo ma fanau o loo auai ai, e le gata i pese ae faapea foi i le taina o meafaaili fesoasoani i le faipese, e pei ona taina ai le pate e le Susuga Saumasevai Taale.
Na faatauina ai foi ma CD i lea lava aso, ma faailoa mai ai foi isi nofoaga o le a faatau atu ai.