O le taleni na tuuina i le tagata o se mitamitaga lea o le loto ma e ao lava ona faaaogā ma faalauiloa auā o le finagalo lea o le Atua ina ia aua le nanāina.
O lea polokalame sa auautasi ai le aiga o le Lulu mai Vini, o alo ia o I‘umalō ma Aniva mai Ulutogia Aleipata, lea sa faia i le Aso Toonai na tea nei, aso 18 o Tesema 2010.
O le solo mai o tagata ia Nicole Lei‘ataua, o se faafafine ua iloga foi lona tomai ona o le matagofie o lona su‘iina o laei Samoa, o se tulaga talafeagai lea, na tonu ai se manatu e faia se po faapitoa e faalauiloa atili ai le tele ma le anaoanoai o le tomai i lana taleni.
Na faamamafa lava lea po i se taumafataga faamavae foi o lenei tausaga ma se‘i silasila ai le mamalu o le auvalaaulia i nei laei. Sa faia ai foi se faaaliga o puletasi, olomuu ma alo‘a o alii, ma e $50.00 le ulufale.
Sa mafai ona faafiafiaina le auvalaaulia i taleni a nisi o faafafine na matuai fiu foi e taliē i le agamalie o nei foi ituaiga. O nisi o i latou sa fai sao i lea po, o Georgina Aiono, Sivania, Shina, Pamela ma Nicole Lei‘ataua.
E ese foi le toatele o ē sa lolofi atu ona o le fia maua o se ‘ata i faafiafiaga a faafafine auā e fai fai lava lo latou fia tamaitai peitai e lē taitai ona matamumuli e toe ta‘u o i latou lava o faafafine. E iai le talitonuga, e pei lava ona au le inailau a tina e faapea foi ona fai mea mafai lenei itupa.
Sa matagofie le po auā sa mafai ona valaaulia ai faafeagaiga ma faletua, faauluuluga o pisinisi ma nisi o tupu ma tamalii o le atunuu ma tagata lautele.
O fofoga o le po o le afioga ia Toleafoa Ian Asiata ma le faletua ia Uo Alalatoa Brown. O pisinisi sa lagolagoina lea faamoemoe o le leitio a le Penina o Asuisui 1197am ma le faleaiga a le WKK SUPER SUPPER a Pauli Atipopo ma Line Wong Kee.
O le puletasi sa manumalo i le matagofie na tauaaoina le $300 saunia e le Leu Transport, le susuga ia Taliaoa Fania mai le Laumua o Tumua.
Na molimauina i lea po le matuā faafiafiaina o tagata uma i le mālie o le faaili lauiloa a le Simply Savaii, faapea le lagolagosua a nisi o sui faasalalau a le leitio (4EB), le susuga ia Peni & faletua ia Senerita faapea Tupuola Siaosi ma le faletua.
Ua iu manuia le faamoemoe, na foi tagata uma ma le vaa ua goto ma le mama ua lomi i le matagofie o tapenaga ae sili ai le faamalieina i le taumafataga manogi sasala sa tapenaina e le WKK SUPER SUPPER a Pauli Atipopo & Line Wonk Kee.
