Ua faalauiloa aloaia i le mamalu o le atunuu se ripoti o taiala aoao mo atinae o tagata tafafao maimoa e faatatau i fesuiaiga o le tau i Samoa mo le 2012-2017. Ua matauina le siisii pea o le suasami, malosi le aasa o ave o le la, o aafiaga mai sunami mafuie ma isi mala faalenatura e lē masani ai. Ma ua tapena ai le Ofisa o tagata tafafao maimoa mai fafo i se ripoti e tagatagai i ai le atunuu mo le atinaega o le tamaoaiga o Samoa i soo se itu.
O taiala ua faalauiloa mai i le ripoti ua tapenaina, o alafua ia e tapena ai Samoa faapea i latou o loo fai sao i le atinaega o tagata tafafao maimoa mai fafo. E pei ona silafia, o le atinae tau tamaoaiga, o fefaatauaiga faavaomalo, tupe maua, puipuiga o oa faalenatura ma punaoa o le aganuu, o itu uma ia o loo vaavaai agai i ai, ina ia mafai ona faasaoina mai taimi e aafia ai ona o fesuiaiga o le tau.
O itu ua ta‘ua, o loo taulai i ai le atinae o Samoa ma o taiala ua mae‘a tapenaina e le Ofisa o tagata tafafao maimoa, o le a faapea ona malamalama ai le atunuu i itu e ao ona tagatagai i ai i aafiaga ona o fesuiaiga o le tau. I le faalauiloaina o ia taiala, na saunoa ai le afioga i le alii Palemia, Tuilaepa Lupesoliai Sailele Malielegaoi, o aafiaga i fesuiaiga o le tau, o se itu lea o loo faaleagaina ai le atinae o tagata asiasi mai i lo tatou atunuu.
“O taiala ua tapena ma tuufaatasia, o itu tāua ia ua fuafuaina ma e mafai foi ona toe fetuunai mo le faaleleia o le atinae o Samoa mai aafiaga i mala faalenatura,” o se saunoaga lea a le alii Palemia.
O le atinae aupito i aafia lenei ina ua tulai mai le sunami o le 2009 ma na tele foi soifua o tagata tafafao mai na fano ai a o asiasi ma nonofo ai i Samoa. Ma o le isi lenei galuega ina ia mautinoa e lava sauni tagata uma e galulue i lenei atinae ma ia faamautu auala e mafai ona tali atu ai i le toe tulai mai o ni faalavelave faapenei i le lumanai.
O nisi o auala ua agai i ai le au fai faletalimalo ma mataaga tu matafaga, o le sii lea o nei mataaga i nofoaga maualuluga, o le faamautu o faailo i taimi e tulai mai ai nei faalavelave ma le aoaoina o tagata faigaluega i auala e logo ai tagata tafafao mai i taimi faapea.
O le mafai ona faamautu o taiala faapenei na ta‘ua e le Pulega o Tagata tafafao maimoa mai i fafo o le a mautinoa ai le saogalemu o lenei atinae i le lumanai ma o le a faaauau ai ona afea Samoa e tagata tafafao mai i fafo.
E pei lava foi ona silafia ua lē gata i le faamautu o galuega ina ia tali atu i soo se ituaiga faalavelave faalenatura ae ua unai foi aoaoga o le fesoasoani muamua e pei ona faagasolo e le Pulega mo tagata e galulue i lenei atinae tele i totonu o le atunuu.
