“Atina‘e o faatoaga ma faigafaiva mo le lumanai manuia” o le faamoemoe autū lea o le aso faalauiloa a le Matagaluega o Faatoaga ma Faigafaiva lea sa faataunuuina i Nuu.
Ua faapitoa lea faiga e faalauiloa ai galuega ma polokalame tāua o loo tausolomua ai le Matagaluega mo le tamaoaiga o le atunuu i atina‘e tau faatoaga.
Sa faatumulia le mamalu o le atunuu faapea foi i le fanau aoga i le fia molimauina o lea faamoemoe tāua, ma se‘i tagatagai foi i galuega o loo faatino e le Matagaluega aemaise nisi o atina‘e o loo lagolagoina e le Malo o Saina.
O loo galulue ai nisi mai i lea malo tele mo le faalautele atu o tomai o loo maua mai foi i lea atunuu mo faifaatoaga i Samoa nei.
O le mae‘a ai o le sauniga lotu faapitoa na taitaia e le susuga i le faafeagaiga, Rev. Loama Mavaeao, na saunoa ai loa le afioga i le Minisita o le Matagaluega o Faatoaga ma Faigafaiva, Le Mamea Ropati Mualia i upu autū o le aso.
Na saunoa Le Mamea, o lea faiga o se manatu o le Malo aemaise le Matagaluega i se auala e faalauiloa atu ai i le mamalu o le atunuu, galuega o loo feagai ma le Matagaluega mo le atina‘eina o le tamaoaiga o le atunuu i le itu tau faatoaga ma faigafaiva.
O le isi lea fuafuaga fou ua mafai ona faataunuuina e le Matagaluega ona o le taumafai lava e faasoa atu i le atunuu aemaise le ‘au faifaatoaga o le tomai mo le alualu i luma o lea atina‘e.
“O le faaleleia o le itu tau faatoaga ma le atina‘eina o le tamaoaiga o Samoa, mo le silafia a le atunuu, o ia atina‘e fou o auala e faatosina ai fai faatoaga e galulue faatasi ma le Matagaluega mo le faaleleia o le atina‘e mo faatoaga,” o le saunoaga lea a Le Mamea.
Na ia ta‘ua foi, o le faamoemoe o le Matagaluega, ina ia faataitai i le au faifaatoaga tomai eseese mo le atina‘e o faatoaga.
O vaega e tolu na faamamafa i le faalauiloa a le Matagaluega, o le poloketi (project) o le faatoaga fualaau aina o loo galulue faatasi ai Saina ma Samoa (China-Samoa Demonstration Farm), o le faalauiloa mo le itu o mea totō ma laau totō, ma le faalauiloaina o se tasi o auaunaga a le Faalapotopotoga o Tamaitai faipisinisi i Samoa (Women in Business) lea sa tatalaina i le masina na tea nei, o meafaigaluega faapitoa o loo faaaogā ai metotia ma le tomai faapitoa, ma o se tasi o auaunaga o loo taulamua ai lea Vaega o le gaosia o le suauu poo faguu i le laau o le fetau.
O le atina‘e poo le faatoaga fualaau aina a Saina ma Samoa o loo faatupeina e le Malo o Saina, ma na faafetaia lea itu e le afioga ia Le Mamea ona o lea fesoasoani e lē gata i lea ae mo soo se atina‘e o loo faatinoina e Saina e fesoasoani ai mo le atina‘e o Samoa.
O laau totō eseese o loo galulue ai le ‘au Saina ua faamoemoe le Matagaluega o le a faalautele atu i nuu i tua ma o le a faia foi a‘oa‘oga e faasoa atu ai lea tomai faapitoa i nuu i tua mo le isi tolu tausaga.
O le faia o fale e fafaga ai meafafaga mo le gaosia o le kesi i otaota o meatuaolo e gaosi ai le eletise, faaaogāina o metotia i soo se fualaau ma le faia o a‘oa‘oga mo fai faatoaga, o vaega tetele ia e tolu o le faalauiloa a le Matagaluega mo le mamalu o le atunuu aemaise i le ‘au faifaatoaga mo le atina‘e o faatoaga ma faigafaiva.
