O se aso fiafia i le potopoto ai o aiga ma uo faapea alo ma fanau i le aso toto‘a ma le manino, le Aso Toonai aso 10 o Ianuari 2015, na faamanatu ai le aso soifua o le Tamā matua (aso soifua 5 Ianuari 1945).
O ona alalafaaga e lauiloa ai o Vailoa Palauli, Leone Amerika Samoa, ma Manunu i Anoamaa. Viia le Atua i le soifua o nai matua.
Sa faatumulia le BLVD Restaurant i Springfield. sa taitaia le sauniga lotu faafetai i le Atua e le susuga i le faafeagaiga ia Siimalevaa Manu Sione o le Ekalesia Uniting Church i Goodna, Brisbane, Ausetalia.
Na pei e sisiva le auvalaaulia i le mālie o le taina o le piano e le alo lava o le Tamā ia Lealiifano, le tamaitai o Eseta Magaui Tualaulelei faapea le mālie o musika. Mae‘a le sauniga lotu, sosoo ma le ‘ava e patipatia ai le alofa ma le agalelei o le Atua i le aulia o nei tausaga e tele o lona soifua.
O le MC o le alo lava e toatasi o le toeaina, le alii o Tautuana Tualaulelei. Sa auai faapitoa mai Dr. Telesia Kalavite ma lona alii o Tahaafe Kalavite mai Hamilton i Niu Sila, ma le uo mamae a le toeaina sa galulue i tausaga e tele i Niu Sila, a ua nofo mai nei i Sunshine Coast, le susuga ia Raymond ma le faletua ia Ainsley Roebeck. Sa auai mai foi se tasi uso mai Niu Sila, le afioga Faaofonuu Fiu Liki Alatupe.
Ua fai meaalofa nei le fanau i le pasese o se tafaoga i Samoa a le latou Tamā. Faamanuia tele le Atua i lou aso soifua tamā. Alofaaga o lau fanau ma a latou fanau, tina o le aiga aemaise ou aiga uma.
Na faaiu le aso i tulaga masani o faaaloaloga auā malo faaaloalogia. O faaaloaloga sa fetalai i ai le tofa ia Fiu Liki Alatupe ona faaiu ai lea ma ta‘ape le aofia ma le vaa ua goto ma le mama ua lomi.
