O le malaga asiasi mai a le Afioga i le Alii Pule o le Oceania Communications mai Aukilani Niu Sila, le susuga ia Fata Ueligitone Malifa na faatoa faalogo ai lea o le toatele i Sini i avanoa o loo alu alu ai i luma soifuaga atinae o le mamalu o le atunuu i Niu Sila i vaega eseese.
I se faatalatalanoaga i luga o le alaleo FM89.3 e le polokalame a le Samoa Sportstar, na saunoa le Faatonu i auala o loo fesoasoani ai la latou polokalame i le leitio Radio Samoa faapea le ‘Talanoa’ i luga o le Triangle TV ma le Sky i le faapupulaina o nei avanoa.
“I le silia ma le limasefulu tausaga talu ai le siitia mai o nisi o tatou tagata mo le sailiga o lumanai manuia i Niu Sila ma Ausetalia. Na amata i galuega na moomia i lea vaitau e pei o fale fasimanu, falegaosi oloa ma isi faapena auā sa moomia nisi e faataunuuina.:
“Ae peitai o lenei vaitau ua vaaia pea le toaitiiti o pasene o nai o tatou alo ma tagata i galuega maualuluga totogi lelei. O le auga lea o la matou tautua a le Oceania Communications 2000 e fesootai ma taiala i o tatou tagata PAsefika e aofia ai Samoa ia ausia nai faailoga ma laasaga e siisii ai le silafia ma faailoga e taitoalua ma le poto masani.”
O se tamalii e maoae le soifua fia tautua mo le manuia o tatou tagata i Niu Sila faapea lea ua faafofoga i ai Samoa i Sini nei. O se faatusatusa a le susuga ia Fata Ueligitone Malifa na faaluaina e le mamalu o le faafofogaaga i luga o le FM89.3 i Sini o le fesoasoani lea o se faailoga e pei o se certificate II, III ma luga atu foi e toalua ma le sefulu tausaga talu na iai i se galuega mo se totogi tele, ae lē gata i lea o se avanoa e faalauteleina ai se agavaa na malaga mai o ia i Samoa e pei o le fomai, faiaoga ma le suetusi. O nei vasega po i Niu Sila ma Sini nei e maua ai foi avanoa e toe aooga ai i le Iunivesite mo Tipiloma ma Tikeri.
“O le mau a le Oceania Communications 2000 e lagolagoina lava le talitonuga o le aoaoina o le tagata e faatoa taualuga lava pe a tuua lenei lalolagi,” faailoa mai e Fata Malifa.
Sa faailoa foi e Fata o le toatele lava o nai o tatou tagata matutua i Niu Sila ua atoa le tai onosefulu tausaga (60) ae peitai faatoa faauuina auā faatoa maua avanoa e sailiili ai ma faatino aoaoga na lē ausia i tuatuagia o talavou.
I Sini Ausetalia nei o loo tele foi avanoa i aoga (Colleges) ma le TAFE e faia ai tusipasi e laasia ai avanoa faa-Iunivesite ma luitau ai le tupulaga laiti ma fanau.
Ua vaaia foi le toatele o tagata Samoa ma le Pasefika i tofi faavaomalo ma upufai a Niu Sila peitai e leai lava se sui o le Pasefika ma Samoa ua tulai mai i se tofi faipule faapea le kapeneta o Ausetalia. O nei laasaga e lē mafai ona ausia pe afai e lē amata unaia o tatou tupulaga lalovaoa i le taimi nei auā le lumanai.
Ua ofo mai foi le tautua a le Oceania Communications 2000 Media e faasoa atili mai ai nei taualumaga i Niu Sila mo Sini nei e ala i se fesootaiga ma le FM89.3 Samoa Sportstar i Aso Lua taitasi mai le itula e lua (2pm-4pm) aemaise le galulue soosoo tau‘au ai ma le Asosi Tusitala i Sini (Sydney Samoa Media Association) mo le tautuaina o le atunuu i itu tāua faapea foi taaloga.
O le susuga ia Fata Ueligitone Malifa ma le faletua ia Peti na faatonu i le nusipepa i Samoa o le Hotline, Samoa Sport Monthly (Lomiga o Taaloga).
O lona alo ia Angelo na avea ma sikolasipi a Samoa i le taaloga Soka aepeitai o Nese Malifa ua iloga i le taitoafitu ma le Ipu o le lalolagi mo Amerika. O le susuga ia Fata e mai le afioaga o Afega a o le faletua ia Peti sa soifua mai i Vaivasetai.
