O alo tama e toalua o le susuga ia Toi Fotulafai Filisavaii Toetu Pesamino ma le tina ia Silivelia, o loo aumau i Kalaiesetete na malaga mai i luga nei i Aukilanai i le Aso Faraile e faataunuuina ai le faafugaina o ao o le la fanau o Jacob ma Benjamin.
O nei aualii e tai 12 tausaga ma le 10 tausaga, ma sa soifua mai lava a o laiti o uumi o la lauao seia oo mai i le taimi nei. Ae peitai o le naunau o laua tuaa ina ia faatāua le tu ma le aganuu a Samoa i le tama talavaou o le sa le ulu uumi ua mafua ai ona a‘e se lagona i le tamā ma le tina e tatau ona ‘oti o la lauulu.
O le po la o le aso toonai 25 o Oketopa na tumutumu ai le maota o le matagaluega a le Ekalesia Katoliko i Onehunga i aiga na malaga mai i Samoa, Ausetalia, Kalaiesetete aemaise o aiga na lua ma uo i luga nei i Aukilani sa faatasi uma i ai i lenei faamoemoe tāua.
O se vaaiga fou foi lea i le toatele o tagata na auai auā e seasea ona tupu lea vaega i totonu o le atunuu. O le afioga ia Patele Andrew na saunia le tatalo e amata o le polokalame, a o Patele Falaniko ma Patele Mikaele Leilua na otiina ulu o le fanau ia Jacob ma Benjamin.
Sa vaaia le tutulu o nisi o mātua i le taimi na oti ai o laua ulu, auā foi o se mea sa faapelepele i ai a o lenei ua aveesea. O le susuga ia Loau Solamalemalo Keneti Sio na saunoa e faamatala le uiga tonu o le faamoemoe, ma na ia ta‘ua ai o se tasi lea vaaiga sa iai tuaa ua mavae, ma nisi foi o itumalo, e faatāua ai le otiina o ulu o tama ua leva ona faasao mai, ae o se taimi muamua lea ua oo ai se tafi.
E fai lelei le lotu ma le aiga tele e fiafia ai aiga. O le tofa ia Namulauulu Letufuga Filipo Leupena sa fai ma tootoo o le po, faatasi ai ma le faili a le Matai Band sa faanofo filemu ai le auvalaaulia.
Na maea le otiina o ulu Jacob ma Bengamin ona fai lea o le la siva Samoa, faatasi ai ma nisi o faafiafiaga. Na salani mea uma i le felanulanuai o taumafataga a le Tama Matu lea sa sekiina le laulau o le po. Na taualuga polokalame i faaaloaloga mo le auvalaaulia e pei ona masani ai tu ma le aganuu a Samoa.
O Toi Fotulafai Filisavaii Toetu Pesamino ma le faletua ia Silivelia Amoa Pesamino o loo aumau nei i Kalaiesetete ma le la fanau ma fai ai nisi o laua pisinisi e pei o le faleaiga ua faaigoaina o le Tama Matu, o le Au Kamuta ua faaigoa o le Tama Mosi Builder ma le Teine Matu o le falesuisui.
