O le taua tele o mafaufauga sa tauina ma loimata, leai se saoloto o le mafaufau atoa ma le agaga, o le taimi pito sili lea ona tulimatai i ai le olaga aoaoina o le tagata tauivi ma filigā auā se ‘ai mo le aiga aemaise lava le sini o le tausinioga.
O le Aso Lulu 17 Tesema 2014, na faia ai le faauuga a le James Cook University, i Townsville, Qld. E toatele tamaiti na faauu mai ai e aofia ai ma le tamaitai o Mauinuuese Marion Imo, o se alo e faasino i le susuga i le Faafeagaiga o Poloaiga ma le faletua ia Lauao Imo (Faifeau EFKS Townsville) na faamanuiaina i le faailoga o le Bachelor of Physiotherapy.
Ua lagiina le viiga ma le faamanū i le Atua, ona o lona alofa ma lona agalelei, ua Ia faamanuia ai le taumafaiga a Mauinuuese ua taunuu ai le faamoemoe. O se fiafiaga tele lenei mo le matou ekalesia, aemaise mo le Pulega i Matu ma le Matagaluega a Kuiniselani EFKS, i le faamanuiaina o alo ma fanau ma faaaogāina i latou i tiute ma faiva ua Ia finagalo i ai.
Faafetai i le tapuaiga a mātua ma aiga pele, o nuu ma ekalesia, ua taunuu le faamoemoe e pei ona sa tausinio i ai le tamaitai o Mau. Ua sauni le tamaitai o Mauinuuese e tuua nai ona mātua ma le aiga ae malaga mai e faigaluega i Brisbane e faaauau ai lana galuega i le matātā o le Physiotherapy.
