O le faafiafiaga a le Enchiro lea o loo faauluulu i le afioga i le aloalii ia Galumalemana Naea Tagaloa Harry ma le faletua ia Wendy Apu Timoteo ma le nofoaalo, sa faapea ona faia i le po o le Aso Toonai na tea nei.
Sa faapea ona faafoeina le po e le MC numera tasi le afioga ia Pulotu Canada McCarthy mai Niu Sila. O le po atoa sa fai sao ai le afioga ia Aumua To‘afa Te‘o ma le susuga i le alii pese lauiloa ia Seiuli Pesa Ilimaleota i pesepesega sa fai lea ma fesuiaiga i le faaili a le Island Eagle.
Na toe faamanatu ai e Seiuli lana pese i le mama, soia le nanāina mama pe a o i le fale faafiafia auā e toe malama ane lava le aso fou e toe silasila atu i lau tautoga sa e faananau i ai. Sa matagofie le faamoemoe i le lagolago a le atunuu ma na leai se vevesi auā na mataala le au sekulaki.
