E uigaese se vaaiga na iai le vaega tutotonu o le taulaga faatau i Otara i le Aso Toonai talu ai, a o nofoi faataamilomilo le mamalu o le nai tamā ma tina matutua i o latou nofoa faataavalevale, ma patipati atu e faaali lo latou agaga faafetai i le susuga i le alii pese lauiloa, le afioga Asuao Lealaitagomoa Felise Mikaele, a o fegauiai mai lona tino i luga o le stage, i le faaatoatoaina o lana faafiafiaga i lea aso.
O se aso na ta‘ua e le alii faafiafia, na ia filifilia e faia ai sana faafiafiaga faapitoa auā nai tamā ma tina matutua, ma nisi foi o le mamalu o le atunuu e le mafai ona pa‘au atu i totonu o fale faafiafia o loo masani ona pese ai.
Ae pei sa faasino tonu lona faamoemoe, ona o le aso foi lea sa tua i le Aso Sa o Tina, ua avea ai foi o sana meaalofa faapitoa mo tina uma o le atunuu.
Ua leva ona faafofoga tagata i musika ma pesepesega a Felise Mikaele i luga o alaleo faasalalau, peitai o le lolofi atu i lea aso ua pei lava o lea faato‘ā faalauiloa le taleni pese a Felise, e faaalia ai le naunau tele o tagata i fatuga a lenei foi tamalii o le atunuu.
E taga eseese lava lea aso, o nisi sa mananao ia na ona saofafai lava pe tutū ma faalogologo toto‘a i upu o pese. Peitai sa vaaia foi le faaaogā lelei e isi o le musika, auā e lei ge i le tumutumu o tagata, ae na matuā lalolalo lava ma siva ma le malosi.
O le aso lava foi lea na faalauiloa atili ai nisi o lipine pese a le afioga ia Asuao e pei o lana CD Volume 23 ‘Fuli mai lou Tua’ faapea le ata pese DVD ua logologoā ona tala i le ‘Leoleo ma le Mamoe’, e pei ona foi mai ai lana faalauiloaga i lo tatou atunuu faapea le motu i Sasa‘e o Tutuila.
Sa lei faigofie foi i le tusitala le alu ese mai lea tumutumu i le Aso Toonai, a o ia lagona atu le pesepese mai o Felise i se tasi o ana fatuga faamomoiloto “Tuu maia ou tiga”, ona e manatua ai e le tusitala sē e sili ona latalata i lona loto, a o soifua mai ma avea ma faauluuluga i se tasi o faalapotopotoga tau sulufaiga i Samoa, le Faatāua o le Ola, talu ai o le pese lea a Felise sa avea ma theme song i le tele o ana polokalame faagasolo mo le faatāuaina o le soifua.
E faamalo atu ai foi i lenei tamalii o le atunuu i le auala o loo faaoo ai lana ia tautua mo le mamalu o Samoa i soo se itu o le lalolagi, e tauala atu i lana taleni pese.
